Toshkent viloyatida haydovchi piyodaning o‘limiga sababchi bo‘ldi

Joriy yilning 17 aprel kuni Toshkent viloyatida yuz bergan yo‘l-transport hodisasi natijasida 33 yoshli piyoda halok bo‘ldi. Bu haqda IIV huzuridagi Tergov departamenti ma’lum qildi.

YTH soat 17 aprel kuni 23:50 larda Zangiota tumani “Turkiston” mahallasidan o‘tgan M-39 yo‘lida yuz bergan. Noma’lum haydovchi, tergovga qadar tekshiruv davomida noma’lum avtomashinasida Toshkent tomon harakatlanib ketayotganda M-39 yo‘li 818-kilometri avtomobil qatnov qismida 33 yoshli fuqaro V.R.ni urib yuborib, hodisa joyidan yashiringan.

Ushbu yo‘l-transport hodisasi oqibatida piyoda V.R. hodisa bo‘lgan joyida vafot etgan.

Holat yuzasidan noma’lum shaxsga nisbatan Zangiota tumani IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish) va 117-moddasi 2-qismi (Xavf ostida qoldirish) bilan jinoyat ishi qo‘zg‘atilgan.

Dastlabki tergov jarayonida olib borilgan tergov-tezkor harakatlari natijasida ushbu yo‘l-transport hodisasini Toshkent shahar Yunusobod tumanida yashovchi 26 yoshli A.Sh., boshqaruvidagi Nexia rusumli avtomashinasida sodir etganligi aniqlanib protsessual tartibda ushlangan.