Ҳиндистондан жўнатилган наркотикни почтадан олаётган шахс ушланди (видео)

Ҳиндистондан почта орқали юборилган 1,8 кг кучли таъсир қилувчи дори воситалари тўхтатиб қолинди. Бу ҳақда Давлат хавфсизлик хизмати хабар берди.

ДХХ ва Божхона органлари ҳамкорлигида Тошкент шаҳрининг Юнусобод туманидаги почта бўлимида ўтказилган тезкор тадбирда Тошкент вилоятининг Тошкент туманида яшовчи, 1994 йилда туғилган шахс Ҳиндистондан юборилган жўнатмани қабул қилиб олиб, кетаётган вақтида тўхтатилган ҳамда тегишли тартибда текширилган.

Натижада ушбу жўнатма ичида таркибида жами 1,8 кг “Прегабалин” кучли таъсир қилувчи моддаси бўлган 6000 дона капсула борлиги аниқланган.

Билдирилишича, ҳозирда ушбу шахсга нисбатан Жиноят кодексининг 246-моддаси 1-қисми (гиёҳвандлик воситаларини, психотроп моддаларни ёки уларнинг аналогларини кўп миқдорда контрабанда қилиш) билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Таиландни тарк этиши керак бўлган икки Ўзбекистон фуқароси Пукет халқаро аэропортида божхона ходимлари томонидан юклари ичига яширилган 26 килограммдан ортиқ каннабис билан ушланган эди.