Ҳеч ким менга нимани сотишни айта олмайди – Трамп F-35 ҳақида

АҚШ Президенти Дональд Трамп Исроил Бош вазири Биньямин Нетаньяхунинг Туркияга F-35 қирувчи самолётларининг сотилишига билдирган эътирозларига муносабат билдирди. Бу ҳақда у кеча, 27 июль куни Air Force One бортида журналистларга берган интервьюсида сўз очди.

Трамп Туркияни “ажойиб иттифоқчи” деб атаган ва Президент Ражаб Тойиб Эрдўғанни минтақавий масалаларда, жумладан, Сурияда “жуда яхши иш” олиб борган “дўсти” ўлароқ таърифлаган.

“У менинг дўстим (Ражаб Тойиб Эрдўған) ва ҳеч ким менга нимани сотишимиз ёки сотишга ҳаққимиз йўқлигини айта олмайди. Туркия мен учун ажойиб иттифоқчи бўлиб келмоқда”, дейди АҚШ етакчиси.

Шунингдек, у Анкаранинг Исроил ёки Нетаньяхуга “катта ишқибоз эмаслигини” тан олган ҳолда, Вашингтон ва Анкара ўртасидаги икки томонлама шериклик мустаҳкамлигича қолаётганини қайд этган. Трамп, шу билан бирга, Туркия армияси “ажойиб” эканини билдирган. 

“Жуда катта қуролли кучлар. Жуда қудратли мамлакат”, дея қўшимча қилган у.

Қайд этиш жоиз, Исроил Бош вазири Биньямин Нетаньяху жорий йил июль ойи бошида Туркия томонидан Американинг F-35 қирувчи самолётлари харид қилиниши Яқин Шарқдаги кучлар мувозанатининг бузилишига олиб келишини айтган эди. У “Туркиянинг тажовузкор ниятлари борлигини” қўшимча қилган. “Axios” маълумотларига кўра, Нетаньяху аввалроқ Трамп билан телефон орқали мулоқотда ундан республика Ҳарбий-ҳаво кучларини модернизация қилиш учун Туркияга янги қурол тизимларини топширишдан тийилишни сўраган.

Маълумот учун, Туркия 2017 йилда Россиядан С-400 тизимларининг тўртта партиясини харид қилганидан сўнг F-35 дастуридан чиқариб юборилган эди. 

Эслатиб ўтамиз, жорий йилнинг июль ойида Туркияда бўлиб ўтган НАТО саммитида Трамп Анкарага F-35 сотишни қайта тиклаш масаласини кўриб чиқишини айтганди ва Туркияни “бошқа мамлакатларга қараганда анча содиқ” деб таърифлаган эди. Эрдўғаннинг сўзларига кўра, Трамп Туркияга F-35 қирувчи самолётларини етказиб бериш бўйича “ижобий позицияни” эгаллаган.