Zominda ayiqlar tog‘dan pastga tushyaptimi? (video)

Ijtimoiy tarmoqlarda Jizzax viloyati Zomin tumanidagi tog‘li hududda yirtqich ayiq yurgani va ularning tog‘dan pastga tushayotgani haqida xabarlar tarqaldi. Mazkur xabarlar yuzasidan viloyat Ekologiya boshqarmasi munosabat bildirdi.

Qayd etilishicha, Zomin milliy tabiat bog‘i nazoratchilari hududni tunda nazorat qilish chog‘ida yo‘l bo‘yida ayiq yurganiga guvoh bo‘lgan va bu holat mobil tasvirga olingan.

Joriy yilning 14 may kuni milliy bog‘ matbuot xizmati tomonidan bu tasvir Telegram'dagi rasmiy kanalga joylangan va tarmoq foydalanuvchilari tomonidan noto‘g‘ri talqin etilib, tarqatilgan.

Ma’lumot uchun, videoda Tyan-Shan qo‘ng‘ir ayig‘i aks etgan bo‘lib, u respublika faunasi noyob turlaridan biri. Mutaxassislar uni tabiatan kamyob, ya’ni mozaik tarqalgan kenja tur o‘laroq hisoblaydi. Tyan-Shan qo‘ng‘ir ayig‘i Qizil ro‘yxat va O‘zbekiston Qizil kitobiga kiritilgan.

Eslatib o‘tamiz, avvalroq Surxondaryo viloyati Sariosiyo tumanidagi ba’zi qishloqlarda tog‘li va tog‘oldi hududlarida havo sovib ketgani sababli tog‘dan bo‘rilar tushib kelgandi.