Жиззахда 2,6 млрд сўмлик крипто-активларни ноқонуний айлантирган йигит ушланди

Жиззах вилоятида 19 ёшли йигит махсус платформа орқали 2,6 миллиард сўмлик крипто-активларни ноқонуний ўтказиш ва айирбошлаш билан шуғуллангани аниқланди. Бу ҳақда Ички ишлар вазирлиги Кибержиноятларга қарши курашиш департаменти хабар берди.

Маълум қилинишича, ҳолат жорий йилнинг апрель ойида ИИБ Кибержиноятларга қарши курашиш бошқармаси ходимлари томонидан ўтказилган тезкор-қидирув тадбирлари давомида аниқланган.

Қайд этилишича, текширув давомида 2007 йилда Ғаллаорол туманида туғилган йигитнинг Samsung S24 Ultra, iPhone 16 Pro ва iPhone 11 русумли телефонлари кўздан кечирилган. У ушбу қурилмалар орқали махсус платформа орқали крипто-активлар айланмаси билан ноқонуний шуғулланиб келаётганлиги ҳамда мазкур қурилмалар орқали қиймати жами 2 миллиард 600 миллион сўмга тенг бўлган крипто-активларни ўтказиш ва айирбошлаш билан шуғулланиб келаётганлиги аниқланган.

Мазкур ҳолат юзасидан унга нисбатан Жиноят кодексининг 278-8-моддаси (Крипто-активлар айланмаси соҳасидаги қонунчиликни бузиш) 3-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Тоşкентда 2008 йилда туğилган талаба лицензиясиз крипто-биржа фаолиятини юритиб, 64 715 долларга тенг крипто-активлар олди-сотдисини амалга оşиргани аниқланган эди.