Зидан Франция терма жамоаси бош мураббийига айланади

Франциялик мутахассис Зинедин Зидан 2026 йилги Жаҳон чемпионатидан сўнг Франция миллий терма жамоаси бош мураббийи этиб тайинланади. Бу ҳақда журналист Фабрицио Романо маълум қилди.

Аввалроқ, Франция терма жамоаси Жаҳон чемпионатининг ярим финалида Испанияга 2:0 ҳисобида мағлуб бўлиб, финал йўлланмасидан маҳрум бўлган эди. Энди французлар мусобақада учинчи ўрин учун баҳс олиб боради.

Турнир якунланганидан сўнг, 14 йил давомида терма жамоани бошқарган Дидье Дешам ўз лавозимини тарк этади.

54 ёшли Зидан мураббийлик фаолиятида сўнгги марта Мадриднинг “Реал” клубини бошқарган. У 2016-2018 ва 2019-2021 йилларда “қироллик клуби” рулида туриб, жамоа билан уч марта Чемпионлар лигаси, икки марта Испания чемпионати ва икки марта Испания Суперкубогида ғолиб чиққан.

Футболчилик фаолияти давомида Зидан Франциянинг “Кан” ва “Бордо”, Италиянинг “Ювентус”, шунингдек, Испаниянинг “Реал Мадрид” клублари шарафини ҳимоя қилган. У “Реал” билан 2003 йилда Испания чемпиони бўлган, 2002 йилги Чемпионлар лигаси финалида эса Леверкузеннинг “Байер” жамоасига қарши учрашувда ҳал қилувчи голни киритиб, жамоасига ғалаба келтирган. “Ювентус” сафида Зидан икки марта Италия чемпиони бўлган.

Франция миллий терма жамоаси таркибида у 108 та учрашувда майдонга тушиб, 31 та гол урган ва 29 та голли узатмани амалга оширган. Зидан 1998 йилги Жаҳон чемпионати ғолиби, 2006 йилги мундиал кумуш медали соҳиби ҳамда 2000 йилги Европа чемпиони ҳисобланади.