Жоржина Роналдунинг уч нафар катта фарзандини расман фарзандликка олди

Криштиану Роналду ва Жоржина Родригес оиласида тўйдан сўнг яна бир муҳим воқеа юз берди. Португалиялик футбол юлдузининг рафиқаси футболчининг уч нафар катта фарзандини расман фарзандликка олди. Бу ҳақда “Hola” нашри хабар берди.

Манбага кўра, гап Криштиану Жуниор ҳамда эгизаклар Ева ва Матео ҳақида кетмоқда. Бунга қадар Родригес Роналдунинг фақат икки нафар фарзанди – Алана Мартина ва Белла Эсмеральданинг қонуний онаси эди.

Энди Жоржина расман футболчининг беш нафар фарзандининг онасига айланди. Бироқ Роналду катта фарзандларига нисбатан ота-оналик ҳуқуқи ва васийликни сақлаб қолган.

Криштиану Жуниор ҳозир 16 ёшда, эгизаклар Ева ва Матео эса тўққиз ёшда. Роналду ва Родригеснинг қизи Алана Мартина саккиз ёшда, энг кичиги Белла Эсмеральда эса тўрт ёшда.

Жоржина кўп йиллар давомида Роналдунинг барча фарзандлари тарбиясида фаол иштирок этиб келган. У оилавий саёҳатларда уларга ҳамроҳлик қилган ва футболчининг фарзандлари билан тушган оилавий суратларда мунтазам равишда кўриниб турган.

Қонуний расмийлаштириш ишлари жуфтликнинг тўйидан кўп ўтмай амалга оширилган. 

Маълумот учун, Роналду ва Родригес жорий йилнинг 11 август куни турмуш қурган эди. Улар учун бу сана рамзий аҳамиятга эга бўлган. Қарийб ўн йил аввал айнан шу даврда уларнинг муносабатлари бошланган.

Шу тариқа, қарийб ўн йиллик муносабатлардан сўнг жуфтлик нафақат расман турмуш қурди, балки оилавий муносабатларини ҳам қонуний жиҳатдан мустаҳкамлади.