Жиззахда Мексика орқали АҚШга ишга юборишни ваъда қилган шахс ушланди

Жиззах шаҳрида Мексика давлати орқали Америка Қўшма Штатларига ишга юборишни ваъда қилган шахс ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, департаментнинг Жиззах шаҳри бўлими ва ДХХ ходимлари ҳамкорлигида ўтказилган тезкор тадбирда фуқаро Н.Б. (муқаддам судланган) фуқаро Ш.К.нинг ишончига кириб, уни 30 минг АҚШ доллари эвазига Мексика давлати орқали Америка Қўшма Штатларига ишга юборишини ваъда қилиб, 11 200 АҚШ доллари ва 50 млн сўм пулни олган вақтида ашёвий далиллар билан ушланган.

Билдирилишича, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Тошкент шаҳрида ўтказилган рейд тадбирларида хорижлик фуқароларни турли йўллар билан Америка Қўшма Штатларига чиқариб юбормоқчи бўлганлар қўлга тушганди.