Жиддий зарарланган: Луврдан ўғирланган Евгения тожи намойиш этилди

Луврдаги ўғриликдан сўнг илк бор Наполеон III нинг рафиқачи Евгениянинг тожи намойиш этилди. 2025 йилнинг 19 октябрь куни содир бўлган талончилик вақтида ўғрилар шошилиб тожни кўчада ташлаб кетган. Бу ҳақда музейнинг расмий сайтида хабар берилди.

Ўтган йилнинг октябрь ойида юз берган Лувр талончилигида бир гуруҳ жиноятчилар қарийб 88 миллион евро қийматидаги қимматбаҳо буюмларни олиб қочишга муваффақ бўлган. Улар француз монархларига тегишли, бриллиантлар билан безатилган заргарлик буюмларини ўғирлаган. Бироқ улар Наполеон III нинг рафиқаси Евгенияга тегишли тожни жиноят жойидан скутерда қочиб кетаётган пайтда тушириб юборган.

Талончиликдан сўнг музей зарар кўрган тожнинг суратларини эълон қилди. Унда буюм “сезиларли даражада шикастлангани” маълум қилинган, чунки талончилар уни шиша ҳимоя витринасида очилган тор тешикдан ўтказишга уринган.

Тожда олтин бургутлардан бири етишмайди, бироқ барча 56 та зумрад ва деярли барча бриллиантлар (1354 тадан атиги ўнтаси йўқ) ўз жойида сақланиб қолган.

Музей маъмуриятининг қўшимча қилишича, XIX асрда ясалган тож тўлиқ реставрация қилинади, бунда “реконструкция қилиш зарурати бўлмайди”. Реставрация жараёнини Лувр раҳбари Лоран де Кар бошчилигидаги махсус эксперт комиссияси назорат қилади.

Эслатиб ўтамиз, Луврдаги талончилик 2025 йил 19 октябрда содир бўлганди. Жиноятчилар музей очилишидан сал аввал ўғирланган автомобилда музейга борган ва арралардан фойдаланиб, балкон орқали Аполлон галереясига кириб борган.