ЖЧнинг асосий фаворити ўзгарди – “Opta”

Британиянинг “Opta” таҳлил компанияси суперкомпьютери Аргентина терма жамоасини гуруҳ босқичининг иккинчи туридан сўнг Жаҳон чемпионатининг асосий фаворити деб баҳолади. Бу ҳақда компания сайтида хабар қилинди. 

Аргентинанинг турнирда ғолиб чиқиш эҳтимоли 15,46 фоизни ташкил этмоқда. Кейинги ўринлардан Франция (15,06 фоиз) ва Испания (12,48 фоиз) жой олган.

Кучли ўнликдан Англия (9,48 фоиз), Португалия (6,71 фоиз), Германия (6,60 фоиз), Норвегия (5,42 фоиз), Бразилия (4,56 фоиз), Нидерландия (4,26 фоиз) ҳамда АҚШ (4,07 фоиз) терма жамоалари ўрин олган.

Турнир бошланишидан аввал “Opta” суперкомпьютери Испанияни асосий фаворит сифатида кўрсатган эди. Гуруҳ босқичининг биринчи туридан сўнг эса Франция рейтингда етакчиликни қўлга киритган.

Энди эса 2-тур учрашувлари якунлангач суперкомпьютер амалдаги чемпионларни яна бир бор турнирда ғолиб чиқади, деган прогнозларни бермоқда.

Эслатиб ўтамиз, Аргентина терма жамоаси 1-турда Жазоирни йирик – 3:0 ҳисобида мағлубиятга учратган бўлса, 2-турда Австрия устидан 2:0 ҳисобида зафар қучди ва муддатидан аввал плей-офф йўлланмасини қўлга киритди.