ЖЧга энг кўп футболчи юборган клуб маълум бўлди

Абдуқодир Ҳусанов тўп сураётган “Манчестер Сити” клуби 2026 йилги Жаҳон чемпионатига энг кўп футболчи юбораётган жамоа бўлди. Бу маълумот кеча, 2 май куни FIFA барча терма жамоаларнинг якуний таркибини эълон қилгандан кейин тасдиқланди.

“Шаҳарликлар” сафидаги жами 19 нафар футболчи ўз миллий терма жамоалари билан мундиалда иштирок этади. Бу кўрсаткич бўйича “Манчестер Сити” барча клублар орасида пешқадамлик қилмоқда.

Жаҳон чемпионатида қатнашадиган “Манчестер Сити” футболчилари қуйидагилар:

Абдуқодир Ҳусанов (Ўзбекистон), Натан Аке, Тейяни Рейндерс (Нидерландия), Жереми Доку (Бельгия), Омар Мармуш (Миср), Родри (Испания), Раян Шерки (Франция), Эрлинг Ҳоланд (Норвегия), Раян Айт-Нури (Жазоир), Рубен Диаш, Матеуш Нунеш, Бернарду Силва (Португалия), Йошко Гвардиол, Матео Ковачич (Хорватия), Жеймс Траффорд, Нико О’Райли, Жон Стоунз, Марк Гехи (Англия) ва Антуан Семеньо (Гана).

Бу борада иккинчи ўринни Мюнхеннинг “Бавария” клуби эгаллади. Германия грандининг 18 нафар футболчиси 2026 йилги Жаҳон чемпионатида иштирок этади.

Шунингдек, Лондоннинг “Арсенал” ҳамда Парижнинг ПСЖ клублари 16 нафардан футболчисини мундиалга йўллаётган бўлса, “Барселона” сафидан 15 нафар футболчи Жаҳон чемпионатида қатнашади.