ЖЧга чиқиш бутун Марказий Осиё учун улкан фахр – Шомуродов

Ўзбекистон миллий терма жамоаси сардори Элдор Шомуродов олдинда турган Жаҳон чемпионатидаги иштироки ва саралашдаги муваффақият бутун Марказий Осиё учун улкан фахр эканлигини айтди. Бу ҳақда у FIFA расмий сайтига берган интервьюсида маълум қилди.  

“Бу туйғуни сўз билан ифодалаш жуда қийин. Нафақат биз футболчилар, балки бутун Ўзбекистон бу йўлланмани жуда хоҳларди. Натижадан кейин ҳамма жуда хурсанд бўлди, чунки бу халқимиз ва мухлисларимиз учун нақадар муҳим эканини ҳаммамиз тушунардик. Саралашдан чиққанимиздан сўнг, нафақат Ўзбекистондан, балки Марказий Осиёнинг бошқа давлатларидан ҳам кўплаб футбол мухлислари табриклашди. Ҳатто Қозоғистон Президенти бизнинг Президентимизни табриклаганини эшитганман”, дейди Шомуродов.

Шунингдек, у терма жамоа Жаҳон чемпионатида яхши ўйин кўрсатса, Ўзбекистон терма жамоасининг мухлислари бутун дунёда пайдо бўлишини қайд этган.

“Қуръа олдидан ҳам ким билан тушишимиз унчалик муҳим эмаслигини билардим. Бизнинг вазифамиз – гуруҳдан чиқиш, қолганини тақдир ҳал қилади. Албатта, бор кучимизни берамиз. Биз ватанимизни ҳимоя қиламиз ва шу сабабли қаттиқ ишлаймиз. Ўзбекистон кучли жамоа эканини бутун дунёга кўрсатмоқчимиз”, дея қўшимча қилган Элдор.

Бундан ташқари, у дунё Ўзбекистондан чиққан футболчилар Европа клубларида ўйнай олишини кўрганини, бу нафақат терма жамоага, балки бутун ўзбек футболига фойда келтираётганини таъкидлаган.

“Болалигимда Жаҳон чемпионатига чиқа олмаганимизда мухлислар қанчалик хафа бўлганини эслайман. Бугун эса муваффақиятларимиз ва давлатимиз раҳбарининг спортга, хусусан футболга бўлган эътибори туфайли мухлислар муносабати бутунлай ўзгарди. Энди Жаҳон чемпионатида иштирок этишимиз аниқ бўлгач, кўплаб ўзбекистонликлар ҳам АҚШга боришни режалаштирмоқда. Уларнинг трибунадаги қўллаб-қувватлаши бизга катта куч ва янги чўққиларга чиқиш учун мотивация беради”, дейди Шомуродов.

Эслатиб ўтамиз, Ўзбекистон миллий терма жамоаси 2026 йилги Жаҳон чемпионатида илк бор иштирок этади. Улар Португалия, Колумбия ва Ямайка/Конго/Янги Коледония ўтиш ўйини ғолиби билан бирга “K” гуруҳидан жой олган. Учрашувлар Мехико, Хьюстон ва Атланта шаҳарларида бўлиб ўтади.