Жавоҳир Синдоров нуфузли халқаро турнирда ғолиб бўлди

Жорий йилнинг 20-26 май кунлари Швециянинг Мальмё шаҳрида “Tepe Sigeman & Co Chess 2025” турнири бўлиб ўтди ва унда ўзбекистонлик шахматчи Жавоҳир Синдоров ғолиб бўлди. Бу ҳақда Ўзбекистон шахмат федерацияси хабар берди.

Қайд этилишича, мазкур турнир FIDE қоидалари асосида 7 турдан иборат айлана тизимда (раунд-робин) стандарт йўналишда ўтказилган. Турнирда 8 давлатдан 8 нафар дунёнинг энг кучли гроссмейстерлари иштирок этган.

Ушбу нуфузли мусобақада Жавоҳир Синдоров халқаро гроссмейстерлар Тань Чжунъи ва Эрвин Л’Амини мағлубиятга учратган. Шунингдек, у етакчи шахматчилар – Рэй Робсон, Нильс Гранделиус, Василий Иванчук ва Ягиз Каан Эрдогмуш билан дуранг ўйнаган. Натижада Жавоҳир Синдоров 7 имкониятдан 4,5 очко тўплаб, 2741 перформанс кўрсаткичи билан турнирда 1-ўринни эгаллаган.

Эслатиб ўтамиз, аввалроқ Жавоҳир Синдоров дунёга машҳур “Vitality” киберспорт жамоаси билан шартнома имзолагани хабар қилинганди.