Жанубий Корея ва Япония ўрмон ёнғинлари чангалида қолди (видео)

Жанубий Корея мамлакат жануби-шарқида юзага келган ўрмон ёнғинларини жиловлашга ҳаракат қилмоқда. 22-23 март кунлари 20 дан ортиқ йирик ёнғин кузатилиб, тўрт кишининг ҳаётига зомин бўлди ва минглаб одамлар эвакуация қилинди. Япониянинг ғарбий қисмидаги бир неча ҳудудда содир бўлган ёнғинлар камида икки кишини жароҳатлаган. Ёнғинларнинг кенгайиб бораётгани сабабли юзлаб ўт ўчирувчилар уларни ўчиришга ҳаракат қилмоқда. Бу ҳақда маҳаллий нашрлар хабар берди.

Жанубий Кореяда 23 март куни кечга бориб, 9 мингга яқин ўт ўчирувчи, полиция ва давлат хизматчилари ҳамда 120 та вертолёт ёнғинларга қарши курашиш учун сафарбар қилинган. 24 март тонгида қуруқ ва шамолли об-ҳаво шароитига қарамай ёнғинларнинг аксарияти ўчирилган, аммо ҳали ҳам тўртта ўчоқда ёнғин давом этмоқда.

Биринчи ёнғин 21 март куни Санчхон – Жанубий Кёнсан провинциясида (Сеулдан 300 км жанубда) майсазор ўрилаётган пайтда учқун чиқиши оқибатида келиб чиққан. “Yonhap” хабарига кўра, ёнғин ўчириш учун сафарбар қилинган тўрт давлат хизматчиси ҳалок бўлган. 24 март тонгида ёнғин 1 464 гектар майдонни қамраб олган.

22 март куни эса Шимолий Кёнсан провинциясининг Кёнсан туманида, Улсан шаҳрининг Улжу ҳудудида ва Жанубий Кёнсан провинциясининг Кимхэ шаҳрида қўшимча ёнғинлар бошланган. Ийсондаги ёнғин қабр олдида ибодат чоғида келиб чиққан бўлиб, 6 861 гектар майдонни вайрон қилган.

2 740 дан ортиқ киши эвакуация қилинган, уларнинг аксарияти ҳозирча бошпаналарга жойлашган. Ёнғин оқибатида 162 та бино, жумладан Ийсонгдаги бир ибодатхона зарар кўрган.

22 март куни ўша пайтда бош вазир вазифасини бажариб турган Чхве Сан Мок ўрмон хизмати ходимларига аҳолини эвакуация қилиш ва ёнғин ўчириш ишларини хавфсиз бажариш бўйича барча чораларни кўришни буюрган. Ҳукумат Улсан шаҳри, Шимолий ва Жанубий Кёнсан провинцияларида фавқулодда ҳолат эълон қилган.

Жанубий Кореяда ўрмон ёнғинлари одатда февраль, март ва апрель ойларида, энг қуруқ даврда тез-тез содир бўлади.

23 март куни Япониянинг Окаяма, Имабари ва Асо шаҳарларида ёнғинлар бошланган бўлиб, тез орада юзлаб гектар ҳудудни қамраб олган. Окаяма шаҳридаги Каигара тоғида бошланган ёнғин 250 гектар ўрмонни йўқ қилган ва олтита уйга зарар етказган. Эҳиме префектурасидаги Имабари шаҳрида ёнғин оқибатида бир ўт ўчирувчи енгил жароҳат олган. Кумамото префектурасидаги Асо тоғли қишлоғида 23 март куни кичик ёнғин кузатилган, бироқ у 24 март куни эрталаб ўчирилган. Ушбу ёнғинда бир киши енгил жароҳат олган. Маҳаллий ОАВ хабарларига кўра, ёнғин ахлат ёқиш жараёнида бошланган.

24 март куни кундузи ҳам ёнғинларни ўчириш ишлари давом этган, ўт ўчирувчилар ва мудофаа кучларига тегишли вертолётлар оловга қарши сув пуркаган. Бироқ Окаяма ва Имабаридаги ёнғинлар ҳали тўлиқ ўчирилмаган.

Мутахассисларнинг фикрича, қуруқ об-ҳаво ва ўрмонларда тўпланиб қолган қуриган барглар ёнғинларнинг келиб чиқишига асосий сабаб бўлган.

Мазкур ёнғинлар Япониянинг шимолидаги Офунато шаҳрида содир бўлган йирик ўрмон ёнғинларидан бир неча ҳафта ўтиб юз берган. Офунатодаги ёнғин бир кишининг ҳаётига зомин бўлган, 200 дан ортиқ уй ва биноларга зарар етказган ҳамда 2 900 гектар ҳудудни ёндирган – бу шаҳар умумий майдонининг деярли ўндан бир қисмига тенг.

Эслатиб ўтамиз, аввалроқ АҚШнинг Нью-Йорк штати губернатори Кэти Хокул Лонг-Айлендда бир нечта кучли ёнғин ўчоқлари аниқлангани сабабли ҳудудда фавқулодда ҳолат режими жорий этилганини эълон қилган эди. Кучли шамол таъсирида тез тарқалган ёнғинлар сабабли NY 27 автомагистрали ёпилган. Мазкур йўл Лонг-Айлендни Нью-Йоркнинг бошқа ҳудудлари билан боғлаб туради. Тутун бутун ҳудуд бўйлаб тарқалган.