Жанубий Америкада совуқ ҳаво 15 кишининг ҳаётига зомин бўлди

Сўнгги кунларда Жанубий Америкада қишда кузатилмаган совуқлар Аргентина, Чили ва Уругвайда камида 15 кишининг ҳаётига зомин бўлди. Бу ҳақда “The Straits Times” хабар берди.

Нашрга кўра, ушбу мамлакатларнинг ҳукуматлари газ таъминотини чеклаб, фавқулодда бошпана яратиш режаларини амалга оширишга мажбур бўлди.

“Бу ҳафта Чилида ва кенгроқ айтганда, Американинг жанубий конусида содир бўлган воқеа Антарктидадан қутбли ҳаво массасининг чиқиши оқибатида юзага келган совуқ тўлқиндир”, дейди Сантьяго университети иқлимшуноси Рауль Кордеро.

Аргентинада қишда камида тўққиз бошпанасиз одам совуқдан ҳалок бўлди. Буэнос-Айресда 2 июль куни ҳаво ҳарорати 1,9 даража совуққа тушди, бу сўнгги 34 йилдаги энг паст кўрсаткичдир. Талабнинг кўплиги сабабли электр узилишлари баъзи ҳудудларда минглаб одамларни 24 соатдан кўпроқ электрсиз қолдирди.

Мамлакатнинг бошқа жойларида қор Буэнос-Айресдан 450 километр жанубда жойлашган Мирамар каби Атлантика пляжларини қоплади, Патагониянинг кичик Макинчао шаҳрида 1 июль куни ҳарорат 18 даража совуқни қайд этди. Аргентина ҳукумати уйларга газ етказиб беришни таъминлаш учун 3 июль куни саноат ва ёқилғи қуйиш шохобчаларига газ етказиб беришни тўхтатди.

Баъзи ҳудудларда ҳарорат совуқдан пастга тушган Уругвай олти киши ҳалок бўлганидан кейин бутун мамлакат бўйлаб “қизил огоҳлантириш” эълон қилди. Метеоролог Марио Бидегайннинг сўзларига кўра, Монтевидеода ҳарорат 30 июнь куни 5,8 даражага етган, бу 1967 йилдан бери энг паст кўрсаткич.

Чили ҳам энг совуқ кунларда уйсиз одамларни жойлаштириш режаларини кучайтирди. Чили Метеорология агентлигининг маълумотларига кўра, Сантьягодан 400 километр жанубда жойлашган Чиллан шаҳрида 9,3 даража совуқ ҳарорат қайд этилган. Дунёдаги энг қурғоқчил саналган Атакама чўлининг баъзи қисмларида сўнгги ўн йил ичида биринчи марта қор ёғди.

Яқин кунларда минтақадаги вазият яхшиланиши кутилмоқда.

Жанубий Америкада қиш июнь ва август ойларига тўғри келади. Материкнинг шимолий қисмидаги текисликларда бутун йил давомида ҳарорат 20-28 даража иссиқ, жанубда эса январда 10 даража илиққача тушади.