Зеленский янги йил табригида Россия билан тинчликка умид билдирди

Украина Президенти Владимир Зеленский Янги йил табригида тинчликка умид билдирди. Унинг табриги Telegram'даги каналида эълон қилинди. 

“Биз тинчликка ишонамиз, у учун курашамиз ва у учун меҳнат қиламиз. Янги йилингиз билан, азиз украиналиклар!” дейилади Зеленскийнинг рафиқаси Елена билан тушган байрамона фотосурати остидаги изоҳда. 

Президентнинг сўзларига кўра, якунланаётган 2025 йил Украина фуқароларининг матонати, фидойилиги ва кундалик меҳнатининг намунасига айланди. У ушбу қадриятларни ҳимоя қилишга, бирлик ва инсон қадр-қимматига ҳурматни намойиш этишга чақирди.

Аввалроқ, Зеленский Украина фуқароларига Рождество табригида исми ошкор қилинмаган номаълум шахснинг “азобда ўлишини” тилаган эди. Жамоатчилик, экспертлар, сиёсатшунослар табрикда ўлим тиланган шахс сифатида Россия Президенти Владимир Путин назарда тутилганини айтди. Шу муносабат билан Россия Президенти матбуот котиби Дмитрий Песков Зеленскийнинг Украинадаги можарони ҳал қилиш бўйича мувозанатли ва адолатли қарорлар қабул қилиш қобилиятига шубҳа билдирди.

Ўз навбатида, Россия Президенти Владимир Путин Украинага қарши урушда ғалаба қозонишга ишонч билдирди. Россия раҳбари шунингдек, “махсус ҳарбий операция” номини олган Украинага нисбатан босқин иштирокчиларини ҳам тилга олди. 

“Мен барча аскарларимиз ва қўмондонларимизни яқинлашиб келаётган Янги йил билан табриклайман! Биз сизга ва ғалабамизга ишонамиз!” деди у.