Зеленский ва меҳмонлари Трампга қўнғироқ қилди

Жорий йилнинг 12 май кунидан бошлаб Украина 30 кунга ўт очишни тўхтатишга тайёр. Бу ҳақда бугун, 10 май куни Украина Президенти Владимир Зеленский ва Киевга борган европалик сиёсатчилар тинчлик саъй-ҳаракатлари бўйича АҚШ Президенти Дональд Трамп билан телефон мулоқоти давомида маълум қилди.

“Украина ва унинг иттифоқчилари жорий йилнинг 12 май кунидан бошлаб 30 кун давомида қуруқлик, ҳаво ва денгизда ўт очишни тўлиқ сўзсиз тўхтатишга тайёр”, деган Украина Ташқи ишлар вазири Андрей Сибига европаликлар ва Зеленскийнинг Трамп билан мулоқоти якунлкангандан сўнг.

Шунингдек, у Киевга борган Европа сиёсатчилари – Франция Президенти Эммануэль Макрон, Германия канцлери Фридрих Мерц, Польша ва Буюк Британия Бош вазирлари Дональд Туск ва Кир Стармер Украина раҳбари Владимир Зеленский билан биргаликда АҚШ Президенти Дональд Трамп билан самарали телефон суҳбати ўтказганини айтган. Мулоқотда тинчликка эришиш учун катта бир қадам қўйилгани айтилган.

“Агар Россия рози бўлса ва самарали мониторинг таъминланса, узоқ муддатли ўт очишни тўхтатиш ва ишончни ривожлантириш чоралари тинчлик музокараларига йўл очиши мумкин”, деган Сибига.

Эслатиб ўтамиз, бугун, 10 май куни Украина пойтахти Киев шаҳрида Украинанинг Россия босқинидан ҳимояланишда ҳарбий ёрдамни давом эттиришга тайёр бўлган ҳамкорлари – “кўнгиллилар коалицияси” учрашуви бўлиб ўтгани ҳақида хабар берилган эди.