Европа лидерлари Зеленский билан Украинанинг келажагини муҳокама қилмоқда

Бугун, 10 май куни Украина пойтахти Киев шаҳрида Украинанинг Россия босқинидан ҳимояланишда ҳарбий ёрдамни давом эттиришга тайёр бўлган ҳамкорлари – “кўнгиллилар коалицияси” учрашуви бўлиб ўтмоқда. Бу ҳақда Украина Ташқи ишлар вазирлиги хабар берди.

Маълум қилинишича, дастлаб, Украина пойтахтига етиб келганидан сўнг, Германия канцлери Фридрих Мерц, Франция Президенти Эммануэль Макрон, шунингдек, Буюк Британия ва Польша Бош вазирлари Кир Стармер ва Дональд Туск Россия юриши оқибатида ҳалок бўлганлар хотирасига ҳурмат бажо келтирган.

Украина Президенти Владимир Зеленский ва биринчи хоним Елена Зеленская билан биргаликда ва Украина фахрий қоровули ротаси иштирокида Европа давлатлари раҳбарлари Мустақиллик майдонидаги вақтинчалик ёдгорлик ёнида хотира шамларини ёққан ва ҳалок бўлганлар хотирасига бир дақиқалик сукут билан ҳурмат бажо келтирган.

Шундан сўнг, “кўнгиллилар коалицияси” учрашуви бошланган, Мерц Россия Украинада 30 кунлик ўт очишни тўхтатиш ва тинчлик ўрнатиш бўйича музокаралардан бош тортса, бунинг оқибатлари билан таҳдид қилган.

“Ўшанда санкцияларнинг кенг кўламли кучайтирилиши ва Украинага янада кенг кўламли ёрдам кўрсатилади”, деган канцлер.

Унинг сўзларига кўра, АҚШ Президенти Дональд Трамп Россия Президенти Владимир Путинга нисбатан сабрсизланмоқда.

“Кремль тезда узоқ муддатли ўт очишни тўхтатиш таклифига жавоб бериши керак”, дея қўшимча қилган Германия канцлери.

Ташриф Москвадаги кенг кўламли ҳарбий парадда иштирок этиш учун Россияга ўнлаб давлатлар раҳбарлари ташриф буюрганидан бир кун ўтиб бўлиб ўтмоқда.

Эслатиб ўтамиз, Германия канцлери Фридрих Мерц, Франция Президенти Эммануэль Макрон ва Буюк Британия Бош вазири Кир Стармер бугун, 10 май куни эрталаб Киевдаги асосий темирйўл вокзалига етиб боргани ҳақида хабар берилган эди.