Зеленский урушда қанча аскар ҳалок бўлганини очиқлади

Россия билан урушда 45,1 минг украиналик ҳимоячи ҳалок бўлди. Бу ҳақда Украина Президенти Владимир Зеленский британиялик журналист Пирс Морганга берган интервьюсида айтиб ўтди.

Унинг маълум қилишича, Россия армиясининг йўқотишлари тахминан 350 минг кишини ташкил этади. 50-70 минг киши бедарак йўқолган, тахминан 600-700 минг киши жароҳатланган. 

Украина Президентининг таъкидлашича, Россиянинг дала тиббиёти Украинаникига қараганда анча заифроқ. 

“Агар одам жанг майдонида яраланган бўлса, у ўша ерда қолади. Ҳисоб-китоблар тахминий, аммо улар ҳақиқатни жуда аниқ акс эттиради”, деган Зеленский. 

У, шунингдек, Украина аскарларидан 45,1 минг киши ҳалок бўлгани ва 390 мингга яқин киши жароҳатланганини айтади. 

“Халқимизга келсак, 45,1 минг киши ҳалок бўлди, 390 мингга яқин жароҳатланганлар бор”, деган Украина раҳбари. 

Зеленскийнинг таъкидлашича, ҳозирда ҳимоячиларнинг кўпчилиги жароҳатларидан тузалиб, жанг майдонига қайтмоқда. 

Маълумот учун, 2024 йил февралида Зеленский  кенг кўламли босқин бошланганидан бери 31 мингга яқин украиналик аскарлар ҳалок бўлганини айтганди. Сентябрь ойида WSJ Ғарб разведкаси маълумотларига таяниб, кенг кўламли босқин бошланганидан бери Украина мудофаа кучларидан 80 мингга яқини ҳалок бўлгани ва 400 мингга яқини яралангани, Россия армиясидан эса 200 мингга яқин аскарнинг ҳалок бўлгани ҳақида ёзган эди. Зеленский бу хабарни ёлғон деб атади ва ҳақиқий кўрсаткич анча паст эканини айтди.

Эслатиб ўтамиз, аввалроқ Украинадаги урушда камида 83 минг 338 нафар россиялик ҳарбий ҳалок бўлгани ва Украина ҳам ўз навбатида, 43 минг аскарини йўқотгани, яна 370 минг киши жароҳат олгани ҳақида хабар берилганди. Бироқ ҳақиқий ўлим сони 1,5-2 баравар кўп бўлиши мумкин.