Зеленский Трампдан узр сўраши керак – Марко Рубио

Украина Президенти Владимир Зеленский АҚШ Президенти Дональд Трампдан узр сўраши керак. Бу ҳақда АҚШ Давлат котиби Марко Рубио CNN телеканалига берган интервьюсида сўз очди.

АҚШ вакилининг сўзларига кўра, Зеленский Оқ уйдаги учрашувни “фиаско”га айлантириб юборган ва у ушбу иши учун узр сўраши керак. Қолаверса, у Владимир Зеленский ҳақиқатан ҳам можарони ҳал қилишни хоҳлаётганига шубҳа билан қараган.

“Сиз бу ҳақда тажовузкорона гапира бошласангиз – Президент битим тузувчи, у бутун умри давомида битимлар тузган – сиз одамларни музокара столига тортолмайсиз. Шундай қилиб, сиз Зеленский тинчлик битимини хоҳламаслигини тушуна бошлайсиз”, деган Марко Рубио.

Унинг айтишича, Дональд Трамп 1 фоиз эҳтимол бўлса ҳам Украинадаги можарони ҳал қилишга интилади. Шунингдек, у хавфсизлик кафолатларини таъминлаш учун аввало тинчлик шартномасини имзолаш кераклигини айтган.

“У тинчликка тайёр бўлганда қайтиб келсин”, дея Трампнинг сўзларини қайтарган Рубио.

Шунингдек, у Трамп Путинга маълум миқдорда ишониши, шу билан бирга, текширув ҳам олиб бораётганини айтиб ўтган.

Рубионинг таъкидлашича, ушбу мулоқотдан сўнг, музокара “рельсдан чиқиб кетган”.

“Тинчлик ўрнатишга қаратилган саъй-ҳаракатларнинг фаол ва очиқчасига барбод қилиниши ҳар бир кишини чуқур хафа қилади ва менимча, у бизнинг вақтимизни беҳуда сарфлагани учун узр сўраши керак. Бу шундай якун топади”, деган АҚШ Давлат котиби.

Рубионинг айтишича, Трамп, Путин ва Зеленский охир-оқибат тинчлик музокаралари учун учрашадими ёки йўқми, деб ўйлашга ҳали эрта.

“Бу нуқтага етгунимизча жуда кўп иш қилиш керак. Бу мураккаб уруш бўлиб, унинг ортида бир неча йил орқага бориб тақаладиган сабаблар бор. Ҳар икки томонга ҳам кўп сармоя киритилди” дея айтиб ўтган Рубио.

Эслатиб ўтамиз, аввалроқ Украина Президенти Владимир Зеленскийнинг самолёти АҚШдан ҳавога кўтарилгани ва Буюк Британия томонга йўл олгани ҳақида хабар берилганди.