Зеленский Трамп ва Путин билан уч томонлама учрашувга рози бўлди

Украина Президенти Владимир Зеленский Россия Президенти Владимир Путин ва АҚШ Президенти Дональд Трамп иштирокида уч томонлама учрашув ўтказишни таклиф қилди. Бу ҳақда Украина раҳбари кеча, 27 май куни журналистлар билан бўлиб ўтган учрашувда сўз очди.

Зеленский ўз нутқи давомида ҳар қандай форматдаги учрашувларга тайёрлигини билдирган.

“Агар Путинга икки томонлама учрашув тўғри келмаса ёки ҳамма бу учрашув уч томонлама бўлишини хоҳласа, мен қарши эмасман. Мен ҳар қандай форматга тайёрман. Трамп – Путин – мен”, деган Украина раҳбари.

Шу билан бирга, Зеленский АҚШни Россияга қарши санкцияларни кучайтиришга чақирган. Унинг сўзларига кўра, у бу масалани АҚШ Президенти билан муҳокама қилган.

“Биз энергетика ва банк тизими бўйича икки асосий йўналишда суҳбатлашдик. АҚШ ушбу икки соҳани ҳам санкцияларга қўшадими? Мен бунга жуда умид қиламан”, дея қўшимча қилган Зеленский.

Қайд этиш жоиж, 23 май куни Украина Ташқи ишлар вазири Андрей Сибига Украина ва Россия Президентлари – Владимир Зеленский ва Владимир Путин ўртасида юқори даражадаги учрашувни ташкил этиш устида иш олиб борилаётганини маълум қилган. Россия Президентининг матбуот котиби Дмитрий Песков эса, агар икки мамлакат музокарачилари муайян келишувларга эришса, Президент Путин Зеленский билан учрашиши мумкинлигини билдирган. Бироқ қандай келишувлар назарда тутилаётгани очиқланмаган.

Маълумот учун, Зеленский ва Путин шу пайтгача фақат бир марта – 2019 йилнинг 9 декабрь куни Парижда бўлиб ўтган “Нормандия формати” саммитида учрашган. Учрашув бир соатдан ортиқ давом этган бўлиб, дастлаб делегациялар иштирокида, сўнг эса яккама-якка тарзда ўтган эди.

Эслатиб ўтамиз, жорий йилнинг 16 май куни Истанбулда Россия ва Украина делегациялари ўртасида сўнгги уч йил ичида илк учрашув бўлиб ўтганди. Учрашув давомида томонлар “1000 га 1000” форматида ҳарбий асирлар алмашинуви бўйича энг йирик келишувга эришди. Шунингдек, тинчлик келишуви шартлари бўйича меморандум устида иш бошлашга келишилди.

Учрашувдан сўнг Украина Мудофаа вазири Рустам Умаров навбатдаги муҳим қадам сифатида Президентлар Зеленский ва Путин ўртасида учрашув ўтказилишини айтиб ўтди.