Зеленский Трамп билан гаплашиш учун Берлинга борди (видео)

Украина Президенти Владимир Зеленский бугун, 13 август куни Европа етакчиларининг АҚШ Президенти Дональд Трамп билан видеоконференция йиғилишида иштирок этиш учун Берлинга етиб борди. Бу ҳақда Зеленскийнинг матбуот хизмати хабар берди.

Трамп билан Россия Президенти Владимир Путин билан Аляскадаги учрашуви олдидан ўтказилган суҳбат ташаббускори Германия канцлери Фридрих Мерц бўлди. Видеоконференцияда Зеленский, Трамп ва Мерцдан ташқари Буюк Британия, Италия, Польша, Финляндия ва Франция Президентлари ва ҳукумат раҳбарлари, Европа комиссияси президенти Урсула фон дер Ляйен, Европа Иттифоқи кенгаши президенти Антонио Кошта, НАТО Бош котиби Марк Рютте, АҚШ вице-президенти Жэймс Дэвид Вэнс иштирок этади.

“Bloomberg”нинг ёзишича, видеоконференция форматидаги музокаралар Берлин вақти билан соат 15:00 да (Тошкент вақти билан 18:00) бошланади.

АҚШ Президенти Дональд Трамп ва Россия Президенти Владимир Путиннинг Аляскадаги учрашуви 15 август куни Эльмендорф-Ричардсон ҳарбий базасида бўлиб ўтади. Оқ уй матбуот котиби Кэролайн Ливитт хабар беришича, Трамп ва Путин учрашувнинг камида бир қисмини ёлғиз ўзи, фақат таржимонлар иштирокида, маслаҳатчилар иштирокисиз ўтказади. Трампнинг ўзи учрашувни “синов” деб атади.

Саммит эълон қилингандан сўнг Европа етакчилари қўшма баёнот бериб, “дипломатик ечим Украина ва Европанинг ҳаётий хавфсизлик манфаатларини ҳимоя қилиши керак”лигини таъкидлади. Европа етакчилари “Украинада тинчликка эришиш йўлини Украина иштирокисиз белгилаб бўлмаслигини” билдирди.