Зеленский Трамп билан алоқани тиклаш йўлини топиши керак – Рютте

Украина Президенти Владимир Зеленский Оқ уйда Дональд Трамп билан жанжалли музокаралардан сўнг АҚШ билан мулоқотдан бош тортмаслиги керак. НАТО Бош котиби Марк Рютте ва Польша Президенти Анжей Дуда бугун, 1 март куни шундай фикр билдирди.

“Мен Президент Владимир Зеленскийга шундай дедим: “Сиз, қадрли Владимир, Дональд Трамп ва Америка маъмурияти билан муносабатларни тиклаш йўлини топишингиз керак”, деди Рютте BBC медиа корпорациясига берган изоҳида.

НАТО бош котиби Вашингтондаги АҚШ-Украина музокараларини “муваффақиятсиз” деб атади.

Бугун, 1 март куни НАТО Бош котиби Лондонда Украина бўйича саммитда иштирок этиши режалаштирилган. Зеленский аллақачон у ерга этиб борган. Саммитда 10 га яқин Европа етакчилари, жумладан Германия канцлери Олаф Шольц ва Европа комиссияси раҳбари Урсула фон дер Ляйен иштирок этиши кутилмоқда.

Польша Президенти Анжей Дуда ҳам худди шундай чақириқ билан чиқди.

north_east

Дунё сиёсатчилари кимни қўлламоқда – Трамп ёки Зеленский?

“Мен дунёда Қўшма Штатлардан бошқа Россия агрессиясини тўхтатишга қодир бўлган бошқа кучни кўрмаяпман. Уларнинг қобилиятлари беқиёс. Умид қиламанки, охир-оқибат уларнинг сиёсати буларнинг барчасига чек қўяди. 

Ўтган ҳафта Вашингтонга учишдан олдин Зеленский билан гаплашдим. Мен унга Президент Трамп билан хотиржам музокара олиб бориши ва келишув, умумий ечим излаши керак, деб ўйлайман, дедим. Биз музокаралар столига қайтишимиз керак. Президент Зеленский у билан ўтириб, Украинани хавфсиз қиладиган ечимни муҳокама қилиши керак”, деб ёзди у Х ижтимоий тармоғида.

Оқ уйдаги тортишув ва Европанинг муносабати

Кеча, 28 февраль куни Оқ уйда бўлиб ўтган учрашувда Зеленский ва Трамп ўртасида жанжал чиққан. Трамп Зеленскийни ношукурликда, тинчликка тайёр эмасликда айблади ва Киев келишувга эришмаса, Украина бўйича музокаралар жараёнидан чиқиш билан таҳдид қилди. Зеленский ресурслар бўйича келишув имзоламай туриб, музокараларни эрта тарк этди.

Оқ уйдаги жанжал ортидан европалик сиёсатчилар оммавий равишда Украинани қўллаб-қувватлаб чиқишди. Улар орасида фон дер Ляйен, Шольц, Германиянинг бўлажак канцлери Фридрих Мерц ва Франция Президенти Эммануэль Макрон ҳам бор.