Зеленский рус аскарларини ҳарбий жиноятлар содир этишда айблади

Украина Президенти Владимир Зеленский Россия аскарларини Херсонда ҳарбий жиноятлар содир этишда ва тинч аҳолини ўлдиришда айблади. Бу ҳақда “Reuters” агентлиги хабар бермоқда.

Украина етакчисининг айтишича, руслар Херсонда 400 дан ортиқ ҳарбий жиноятни амалга оширган.

“Терговчилар аллақачон 400 дан ортиқ Россия ҳарбий жиноятларини ҳужжатлаштирган. Ҳалок бўлган тинч аҳоли ва ҳарбий хизматчиларнинг жасадлари топилди. Россиянинг (Херсондаги) шафқатсизликлари мамлакатнинг бошқа ҳудудларида амалга оширилганларини ортда қолдирди”, деган у ўзининг одатий тунги мурожаатида.

Россия ўз қўшинлари тинч аҳолини қасддан нишонга олганини рад этган. Жорий йилнинг 24 февраль куни Россия Украинага босқин бошланганидан бери мамлакат бўйлаб бир қанча жойларда оммавий қабрлар, жумладан, Харьков вилояти ва Киев яқинидаги Бучада қийноқлар далилларини кўрсатувчи тинч аҳоли жасадлари топилган. Украина Россия аскарларини жиноятларни содир этишда айблаб келади.

Кеча, 13 ноябрь куни Херсонда янграган артиллерия овозлари шаҳар бош майдонида Украина байроқларини кўтарганча ғалабани нишонлаётган оломонни чўчита олмади.

35 ёшли қўшиқчи Яна Смирнованинг айтишича, одамлар ҳозир хурсандчилик қилмоқда, лекин улар Днепрнинг чап қирғоғидан бомбардимон қилинишдан хавотир олишади. У шаҳар яқинидаги Днепр дарёсининг шарқий қирғоғида жойлашган рус артиллерия қурилмаларига ишора қилган бўлиши мумкин.

Украина Президенти Владимир Зелениский Херсондаги вазият ҳали-ҳануз хавфли эканлигидан огоҳлантирган. Шунингдек, шаҳарда 17:00 дан 20:00 гача бўлган комендантлик соати сақланиб қолган.

Аввалроқ, Россия Ташқи ишлар вазири Сергей Шойгу Қуролли кучларнинг Херсондан чекинишини маълум қилган эди. Россия ушбу шаҳарни жорий йилнинг 23-27 сентябрь кунлари ўтказилган “референдум” натижаларига кўра, ўзининг абадий ҳудуди дея эълон қилган эди. Шунинг учун, Россиянинг чекиниш тўғрисидаги қарори халқаро майдонда катта мағлубият сифатида қабул қилинди. Таҳлилчиларнинг қайд этишича, Президент Владимир Путин ушбу мағлубиятга ўзини бепарво кўрсатишга уринмоқда.