Зеленский Канададаги G7 саммитини шошилинч тарк этди

Украина Президенти Владимир Зеленский Канададаги G7 саммитини шошилинч тарк этди ва ўз мамлакатига қайтмоқда. У Канадага ташрифи дастурини қисқартирди. Бу ҳақда бугун, 18 июнь куни манбаларига таяниб, Украинанинг “Суспiльне” ва Канаданинг CBC телеканали хабар берди.

Украина делегациясидаги манбаларнинг CBC телеканалига айтишича, Зеленскийнинг сафарини муддатидан олдин якунлаш қарори Россиянинг Киевга берган зарбалари, 20 дан ортиқ одамнинг ҳаётига зомин бўлгани, шунингдек, АҚШ Президенти Дональд Трампнинг Канадани муддатидан олдин тарк этиши билан боғлиқ.

Трамп Канаданинг Кананаскис шаҳрида бўлиб ўтган G7 саммитидаги иштирокини зудлик билан тўхтатди ва 16 июнь оқшомидаги учрашувларнинг биринчи кунидан сўнг АҚШга қайтди.

Оқ уй унинг кетишини Яқин Шарқдаги ҳозирги вазият билан изоҳлади. Кеча, 17 июнь куни Трамп, жумладан, Владимир Зеленский билан учрашиши режалаштирилган эди. 

Россия Федерацияси эса 17 июнга ўтар кечаси Киевнинг турли ҳудудларидаги ўнлаб бинолар ва бошқа объектларга, жумладан, тураржой бинолари, таълим муассасалари ва муҳим инфратузилма объектларига ҳужум қилди. Ракеталардан бири Соломенский туманидаги тўққиз қаватли тураржой биносига тегиб, бутун кириш эшиги қулаб тушган. Вайроналар остидан 21 кишининг жасади чиқарилди, қидирув ишлари давом этмоқда. Россиянинг Киевга берган зарбалари қурбонларининг умумий сони 26 кишига етди. Шунингдек, 134 нафар қурбонлар ҳам бор. Бугун, 18 июнь Киевда мотам куни деб эълон қилинди.