Зеленский Донбасснинг келажаги масаласида референдум ўтказишга тайёрлигини айтди

Мамлакат ҳудудлари бўйича қарорни айнан Украина халқи сайлов ёки референдум йўли билан қабул қилиши керак. Бу ҳақда Украина Президенти Владимир Зеленский кеча, 11 декабрь куни журналистлар саволига жавобан айтди.

Президент журналистлар саволларига жавоб берар экан, АҚШ томонидан тайёрланган тинчлик режаси бўйича музокараларда Донбасс ва Запорожье АЭС энг муҳим келишилмаган масалалар бўлиб қолаётганини айтган. 

Унинг сўзларига кўра, муҳокама қилинаётган тинчлик режасида Россия қўшинларини Харьков, Суми ва Днепропетровск вилоятларидан чиқариш таклиф қилинган, бироқ Россия томони Херсон, Запорожье ва энг аввало Донецк вилоятларидан чекинмаслигини билдирган.

“Руслар бутун Донбассни хоҳлайди, лекин биз, албатта, бунга рози эмасмиз. Америкаликлар қандайдир формат излаяпти. Улар бу ҳудудни эркин иқтисодий зона деб атаяпти, руслар эса қарам қилинган зона дея таърифлаяпти”, деган Зеленский. 

Унинг айтишича, Украина чегара чизиғини тўқнашув чизиғи бўйича белгилашни таклиф қилмоқда. Бу масала бўйича муҳокамалар давом этмоқда.

Режага кўра, Украина қўшинлари айрим ҳудудлардан чиқиши, Россия қўшинлари эса у ерларга кирмаслиги керак. Зеленский бу зонада назорат масаласида ҳам кўплаб саволлар борлигини қайд этган. 

“Ҳозирча Америка Қўшма Штатлари томонидан таклиф қилинаётган муросали кўриниш мана шундай”, деган Украина Президенти. 

Украина раҳбари якуний қарор адолатли бўлиши ва халқ позициясига асосланиши лозимлигини таъкидлаган.

“Менимча, бу саволга Украина халқи жавоб бериши керак. Сайлов ёки референдум шаклида барибир халқ позицияси бўлиши зарур”, деган Зеленский. 

Россия томони Запорожье атом электр станцияси устидан назоратни сақлаб қолишни талаб қилмоқда. Украина бунга қарши. АҚШ бу станцияни қўшма фойдаланиш форматини ишлаб чиқмоқда.

Зеленский, шунингдек, АҚШ тинчлик режасини ишлаб чиқиш муддати бўйича бирор қатъий чеклов қўймаганини айтган. 

“Ҳамма имкон қадар тезроқ тугашини хоҳлайди – бу факт. АҚШ ҳам жараённинг тезроқ якунланишини истайди, буни улардан эшитдик. Менимча, улар янги йилга қадар келишув бўйича аниқ тушунчага эга бўлишни истаган, балки ҳозир ҳам исташар”, дея қўшимча қилган у. 

Бундан ташқари, тинчлик режасининг янги версиясида Украина Қуролли кучлари сони бўйича банд ўзгартирилган. Агар биринчи 28 банддан иборат ҳужжатда армиянинг максимал сони 600 минг қилиб кўрсатилган бўлса, сўнгги версияда бу кўрсаткич 800 минг деб белгиланган.

Эслатиб ўтамиз, аввалроқ Франция Президенти Эммануэль Макрон, Германия канцлери Фридрих Мерц ва Буюк Британия Бош вазири Кир Стармер АҚШ Президенти Дональд Трамп билан 40 дақиқалик телефон суҳбатини ўтказганди. Суҳбатнинг мақсади – Укринадаги вазият ва тинчликка эришиш бўйича олдинга қадам ташлашдан иборат эди.