Зеленский биринчи марта Пашинян билан учрашди. Бу нимани англатади?

north_east

Пашинян Арманистоннинг Россия билан муносабатларини стратегик хато деб атади

Украина Президенти Владимир Зеленский ва Арманистон Бош вазири Никол Пашинян Испаниянинг Гранада шаҳрида Европа сиёсий ҳамжамиятининг саммити доирасида қисқа суҳбат ўтказди, бу уларнинг илк учрашуви бўлди. Бу ҳақда Зеленскийнинг Telegram’даги каналида хабар берилди.

Украина раҳбарининг сўзларига кўра, улар Жанубий Кавказдаги хавфсизлик ҳолати, давлатлар ўртасидаги икки томонлама ҳамкорлик ва минтақалараро иқтисодий лойиҳаларни муҳокама қилган. 

“Украина минтақа барқарорлиги ва ундаги мамлакатлар билан дўстона муносабатлардан манфаатдор”, дейди Зеленский.

Сиёсатшунос Юрий Световнинг фикрича, Зеленский ва Пашиняннинг учрашуви шунчаки рамзий маънога эга, Арманистон Украинага ҳеч нарса бера олмайди. 

“Арманистон Зеленскийга ҳеч нарса бермайди. Бу символизм. Бу Зеленскийга “Қаранг, яна бир давлат Россияга дўст бўлиш оқибатларини тушунди”, дейиш имконини беради, холос”, деган Светов.

Шунингдек, у Пашиняннинг рафиқаси сентябрь ойи бошида Киевга келиши ва Зеленскийнинг рафиқаси билан учрашувини ҳам мисол қилиб келтирган. 

“КХШТ таркибига кирувчи ва ўзини Россиянинг иттифоқчиси деб атайдиган Арманистон Бош вазири Украина Президенти билан учрашуви орқали Россиядан узоқлашиш ниятини ошкор этган”, дейди сиёсатшунос.

Маълумот учун, 6 сентябрь куни Арманистон Бош вазирининг рафиқаси Анна Акопян Киевда Украина президентининг рафиқаси Елена Зеленская томонидан ташкил этилган биринчи хонимлар ва жаноблар саммитида иштирок этди. “Armenpress” хабарига кўра, Бош вазирнинг рафиқаси Украинага инсонпарварлик ёрдамиyb топширган. Бу Украина ва Россия ўртасидаги ҳарбий можаро бошланганидан бери Арманистон томонидан кўрсатилган биринчи гуманитар ёрдам бўлди.

Эслатиб ўтамиз, жорий йилнинг 3 октябрь куни Арманистон Миллий ассамблеяси Россия Президенти Владимир Путин ва болалар омбудсмани Мария Львова-Беловани ҳибсга олишга ордер берган Халқаро жиноий суднинг Рим статутини ратификация қилганди.