Зеленский “ашаддий душмани” билан музокарага тайёрлигини билдирди
Олам
−
05 Февраль
9361Украина Президенти Владимир Зеленский урушга барҳам бериш мақсадида Россия Президенти Владимир Путин билан тўғридан тўғри музокаралар олиб боришга тайёрлигини маълум қилди. Бу ҳақда у британиялик журналист Пирс Морганга берган интервьюсида сўз очди.
“Агар бу украиналиклар учун тинчликка эришиш ва одамларни йўқотмасликнинг ягона йўли бўлса албатта, биз музокарага борамиз”, деди Зеленский.
Унинг сўзларига кўра, Украина Президенти бу ҳолда Путинга нисбатан “меҳрибон” бўлмайди, чунки уни “душман” деб билади.
“Очиғи, менимча, у ҳам мени душман деб ҳисоблайди”, деди Украина етакчиси.
Шу билан бирга, Зеленский музокаралар столида АҚШ ва Европа Иттифоқи ҳам бўлиши кераклигини қайд этган. Унинг фикрича, АҚШ Президенти Дональд Трамп можарони ҳал қилишда муваффақият қозониши ва Украинага ишончли хавфсизлик кафолатларини тақдим этиши мумкин. Зеленский, шунингдек, ҳозирда Украина Россия томонидан босиб олинган барча ҳудудларни куч ишлатиб қайтаришга қодир эмаслигини ва “эришилиши ҳам мумкин бўлмаган натижа учун миллионлаб одамларни йўқота олмаслигини” таъкидлаган. У босиб олинган ҳудудларни сиёсий ва дипломатик йўл билан қайтариш таклифини илгари сурган.
“Биз барибир ўз еримизни қайтариб оламиз, чунки биз ҳақмиз ва биз халқаро ҳамда ахлоқий ҳуқуқнинг бирор жиҳатини бузганимиз йўқ”, деди Зеленский.
Шунингдек, Украина Президенти урушнинг фаол босқичи тугаши ва ҳарбий ҳолат бекор қилиниши билан дарҳол сайловлар ўтказилишини ваъда қилди.
“Уруш даврида сайлов ўтказиш мумкин эмас. Қонунчилик ва Конституцияни ўзгартириш керак. Бу эса жиддий муаммоларни келтириб чиқаради. Бизнинг ҳарбийларимиз қандай овоз беради? Босиб олинган ҳудудлардаги одамлар қандай овоз беради? Уруш туфайли чет элда яшаётган саккиз миллион украиналик қандай овоз беради?” деди Зеленский.
Шу билан бирга, ўзининг легитимлиги ҳақида гапирар экан у 2019 йилда унга сайловчиларнинг 73 фоизи овоз берганини эслатиб ўтган.
Маълумот учун, Зеленский илгари ҳам АҚШ ёки ЕИ Украинага хавфсизлик кафолатларини тақдим этса, Россия Президенти билан тўғридан-тўғри музокара ўтказиш эҳтимолини инкор этмаган. Бироқ 2022 йил 30 сентябрда Украина Миллий хавфсизлик ва мудофаа кенгаши Путин билан музокаралар ўтказишдан бош тортиш қарорини қабул қилган эди. Зеленский Россия томонидан Донбасс, Запорожье ва Херсон вилоятларининг аннексия қилиниши фонида бу қарорни маъқуллаган. Кейинчалик, у Путин билан музокараларни тақиқлаш мақсади Украина ичидаги сепаратизмни тўхтатиш бўлганини тушунтирган.
Эслатиб ўтамиз, бунгача Россия Президенти Владимир Путин Зеленскийни Украина Президенти сифатида тан олмаслигини билдирган эди. Путин шунингдек, Зеленский бу сабабли тинчлик келишувини имзолаш ваколатига эга эмаслигини таъкидлаган.
LiveБарчаси
06 Февраль