Зеленский АҚШда. У совуқ хабарлар билан кутиб олинди (видео)

Кеча, 16 октябрь куни Украина Президенти Владимир Зеленский бошчилигидаги делегация АҚШга музокаралар учун етиб борди. Бу ҳақда Украина раҳбари ўзининг Telegram-каналида ёзиб қолдирди.

Зеленскийга кўра, у АҚШда дастлаб мудофаа соҳасидаги компаниялар вакиллари билан учрашувлар ўтказади. 

“Мен аллақачон Вашингтондаман. Бугун мудофаа соҳасидаги компаниялар вакиллари билан учрашувлар бўлиб ўтади. Бу – кучли қурол ишлаб чиқарувчи компаниялар бўлиб, уларнинг маҳсулоти бизнинг ҳимоямизни, албатта, мустаҳкамлайди. Хусусан, қўшимча ҳаво ҳимоя тизимларини етказиб бериш масаласини муҳокама қиламиз”, деган Зеленский. 

Унинг қўшимча қилишича, мудофаа соҳасидан ташқари Америка энергия компаниялари вакиллари билан ҳам учрашувлар бўлади. 

“Ҳозир Россия бизнинг энергетикамизга қарши террор олиб бормоқда, ҳар куни зарбалар бермоқда, биз эса Украина барқарорлиги устида ишлаяпмиз”, деган Украина етакчиси. 

Қолаверса, Зеленский Президент Дональд Трамп билан учрашув режалаштирилгани ҳам айтган.

“Биз умид қиламизки, Яқин Шарқда террор ва урушни тўхтатишда иш берган импульс Россиянинг Украинага қарши урушини тугатишга ҳам ёрдам беради. Путин ҲАМАС ёки бошқа бир террорист гуруҳдан жасур эмас. Куч ва адолат тили, албатта, Россияга нисбатан ҳам иш беради. Аллақачон кўрмоқдамизки, Москва Tomahawk қуроллари ҳақида эшитиши биланоқ мулоқотни қайта бошлашга шошила бошлади”, дея ёзган Зеленский. 

Cамолётдан тушиши биланоқ, Зеленскийни ёмон хабарлар қуршаб олган. Дональд Трампнинг Владимир Путин билан Венгрияда учрашиш нияти ҳақидаги янгилик Киевни ҳайратга солган. “Axios” нашрининг ёзишича, Зеленский жамоаси Трамп ва Путиннинг телефон орқали суҳбати ҳақида олдиндан хабардор қилинмаган. Бу суҳбат Зеленскийнинг Оқ уйдаги музокаралари олдидан бўлиб ўтган. Украина Президенти Трампдан Tomahawk туридаги ракета тизимларини олиш умидида эди, аммо Путин билан келишувлар бу режани чиппакка чиқариши ва Украинанинг барча умидларига барҳам бериши мумкин. 

Эслатиб ўтамиз, аввалроқ Россия Президенти Владимир Путин Америка Қўшма Штатлари Президенти Дональд Трамп билан телефон орқали суҳбат чоғида АҚШнинг Украинага Tomahawk туридаги қанотли ракеталарни етказиб бериш эҳтимоли икки давлат ўртасидаги муносабатларга жиддий зарар етказиши, қолаверса, Украинадаги можарони тинч йўл билан ҳал этиш истиқболларига ҳам салбий таъсир кўрсатишини таъкидлаганди. Трамп Путиннинг фикрлари инобатга олинишини билдирган.