YouTube Shazam’нинг Андроид версиясини тақдим этди

YouTube август ойининг ўзида 6 та янгиланишни синовдан ўтказди. Навбатдаги янгилик қўшиқни ҳиргойи қилиш орқали аниқлайдиган янги функциядир. У Apple’нинг мусиқани аниқлаш иловаси Shazam’га вазифа жиҳатидан ўхшасада, ундан кўпроқ имкониятларни тақдим этиши кутилмоқда. Бу ҳақда YouTube'нинг расмий қўллаб-қувватлаш саҳифасида хабар берилди.

Янгиланиш Андроид версияси фойдаланувчиларга қўшиқни куйлаш ёки ёзиб олиш орқали уни YouTube’дан топиш имконини беради. Бунинг учун овозли қидирувдан янги қўшиқ излаш функциясига ўтиш ва уч сониядан кўпроқ куйлаш ёки ёзиб олинган қўшиқни жойлаш керак. Кейин платформа мусиқани аниқлайди ва бир нечта вариантларини таклиф этади.

YouTube’нинг бош компанияси Google ҳам 2020 йилда худди шундай функцияни тақдим этганди. Аммо унинг куйлаш давомийлигига қўйилган талаби бундан анча юқори – 10-15 сонияни ташкил қилади.

Қўшиқ бўйича қидирув имконияти ҳозирча фақат Андроид фойдаланувчиларининг кичик қисми учун мавжуд. 

Эслатиб ўтамиз, ой бошида Google Apple’да мавжуд бўлган турли хил гаджетларни бир-бирига улаш функциясининг Андроид версиясини тақдим этмоқчилигини маълум қилганди.