Йигитидан воз кечишни тавсия бергани учун қиз ўз онасини 11 марта пичоқлади (видео)

Туркиянинг Самсун шаҳрида 20 ёшли қиз севган йигити билан ажрашишни талаб қилгани учун ўз онасини 11 марта пичоқлади. Бу ҳақда “En son haber” хабар берди.

Она ўз қизига у танлаган йигит ундан фақат фойдаланаётгани, шунинг учун бу муносабатларни тугатишни маслаҳат берган. Аммо бу гап қизда ғазаб уйғотган ва у ўз онасига нисбатан даҳшатли ҳужумга қўл урган.

Маълум бўлишича, қиз онасига шафқатсиз ҳужум қилганидан кейин тез ёрдамга қўнғироқ қилган. Тез ёрдам гуруҳи томонидан оғир тан жароҳати олган она шифохонага етказилган ва зудлик билан даволанишга олинган. 

Воқеа жойига етиб келган полиция қизни ҳибсга олган. Дастлаб, қиз ҳаммасини инкор қилган бўлса-да, кейинроқ айбини тўлиқ тан олган. Онаси эса полицияга берган изоҳида қизининг руҳий ҳолатида муаммолар борлиги, у билан баъзида сабабсиз тортишувлар бўлиб туришини билдирган.

Эслатиб ўтамиз, аввалроқ Сурхондарё вилоятида эркак ўз онасини болта билан чопиб ташлагани ҳақида хабар берилганди. 1987 йилда туғилган ўғил онасидан спиртли ичимлик истеъмол қилиш учун пул сўраган, аммо онаси пул бермагач, уни маст ҳолда болта билан чопиб ташлаган.