Европанинг бир қатор давлатлари “свет”сиз қолди

Европанинг Испания, Португалия ва Франция каби мамлакатларининг айрим қисмларида элект энергияси узилди. Бу ҳақда “Levante” газетаси хабар берди.

Билдирилишича, Испания ҳудудининг деярли ярмида электр энэргияси узилган. Жумладан, Валенция, Мадрид, Барселона ва Севилья шаҳарлари электр таъминотисиз қолган. 

Қайд этилишича, Валенцияда светофорлар, лифтлар, метро ва трамвайлар ишламай қолган. Шунингдек, шаҳарда интернет ва мобил алоқа ҳам узилган. Бундан ташқари, бутун мамлакат бўйлаб темирйўлларда тезюрар поездлар ҳаракати тўхтатилган.

Нашрнинг маълум қилишича, Португалияда ҳам чироқ йўқ.

Испаниянинг EFE агентлиги Х ижтимоий тармоғида аниқлик киритишича, чироқ маҳаллий вақт билан соат 12:30 атрофида ўчиб қолган. Бунга нима сабаб бўлганлиги ҳозирча номаълум.

Энергетика тизими оператори Red Electrica электр энергиясини тақсимловчи компаниялар билан биргаликда электр таъминотини тиклаш устида ишлаётганини маълум қилган.

Қолаверса, Франциянинг жуда катта бўлмаган қисмида ҳам электр энергияси узилиб қолган. Бу эса ушбу мамлакатда ҳам бир қатор тартибсизликларни келтириб чиқарган.

Эслатиб ўтамиз, жорий йилнинг 9 февраль куни соат 11:00 ларда битта маймун 22 млн киши истиқомат қиладиган бутун Шри-Ланкани электрсиз қолдирган эди. Мамлакат Энергетика вазири тармоқдаги трансформаторга маймун теккани, бу эса тизимда номутаносибликни келтириб чиқарганини маълум қилган.