Европа Украинага қўшин киритиши керак – Макрон

Франция Президенти Эммануэль Макрон Европа мамлакатлари Украинага тинчликпарвар кучлар ва қуруқликдаги операциялар орқали ёрдам бериши кераклигини айтди. Бу ҳақда у кеча, 18 август куни Вашингтонда АҚШ Президенти Дональд Трамп, Украина Президенти Владимир Зеленский ва Европа давлатларининг раҳбарлари билан ўтказилган музокаралардан кейинги брифингда сўз очди.

Макронга кўра, тинчликни таъминлаш учун кучли Украина армияси зарур бўлади ва Украинага қуруқликдаги операциялар билан ёрдам кўрсатиш шарт. У, шунингдек, Украинага иттифоқчилари томонидан тақдим этилиши мумкин бўлган тинчликпарварлик миссияларига эҳтиёж туғилишини таъкидлаган. 

Франция раҳбарининг фикрига кўра, бу амалиёт – уруш тугаганидан кейин барқарорликни таъминлаш бўйича саъй-ҳаракатларнинг бир қисми бўлади. У, шунингдек, агар Россия музокараларга тайёрлигини билдирмаса, АҚШ Президенти Дональд Трамп Москва устидан иккиламчи санкциялар ва тарифлар киритиш масаласини кўриб чиқишга тайёрлигини айтган. 

Макроннинг қўшимча қилишича, Европа етакчилари АҚШ томонига тезкорлик билан тинчлик келишувига эришиш зарурлигини айтган. 

Кеча, 18 август куни Трамп Зеленскийни Оқ уйда қабул қилди, учрашув бир соатча давом этди. Кейинроқ музокаралар Европа мамлакатлари вакиллари иштирокида кенгайтирилган форматда давом эттирилди. Асосий мавзулар Украинага келажакдаги хавфсизлик кафолатлари ва Москва билан тўғридан тўғри мулоқотни ташкил қилиш бўйича кейинги қадамлар бўлди.

Трамп, шунингдек, Россия Президенти билан телефон орқали суҳбатлашганини айтди ва Путин ҳамда Зеленский ўртасида учрашувга тайёргарлик бошланганини маълум қилди. АҚШ раҳбарининг сўзларига кўра, аввал икки томонлама, сўнгра унинг иштирокида уч томонлама музокаралар ўтказилиши режалаштирилган.

Россия Президентининг ёрдамчиси Юрий Ушаков ҳам икки давлат раҳбарлари ўртасидаги қарийб 40 дақиқа давом этган телефон мулоқотини тасдиқлади. Унга кўра, Трамп Путинга Зеленский ва Европа вакиллари билан ўтказган учрашувлари натижалари ҳақида маълумот берган.

Эслатиб ўтамиз, аввалроқ “кўнгиллилар коалицияси”даги Европа ҳамкорлари Киев назоратидаги ҳудудларда ўт очиш тўхтатилганидан кейин ҳарбий куч жойлаштиришга тайёр эканини билдирганди.

Россия Ташқи ишлар вазирлиги эса бир неча бор Европа тинчликпарварларини Украина ҳудудига киритиш ғоясига салбий муносабат билдирган ва буни можарони янада кескинлаштирувчи қадам сифатида баҳолаган.