Европа Украина-Россия тинчлик музокараларида қатнашмайди – Келлогг

north_east

Украина бўйича музокаралардаги янги шахслар ким ва Яқин Шарқ уларни қандай боғлайди?

Европа тинчлик музокаралари бўйича маслаҳатлашувларда иштирок этади, бироқ якунда Россия, АҚШ ва Украина ўртасидаги режалаштирилган музокаралардан четлаштирилади. Бу ҳақда бугун, 15 февраль куни АҚШ Президенти Дональд Трампнинг Украина бўйича махсус вакили Кит Келлог Мюнхен хавфсизлик конференциясида маълум қилди.

Ушбу музокараларда Европа иштирок этиши ёки иштирок этмаслиги борасидаги саволга жавобан Келлог “мен реализм мактабига мансубман ва бу рўй бермайди” деб жавоб берган.

“Бу доскага бўр билан чизгандек қулоққа ёқимсиз эшитилиши мумкин, аммо мен сизларга тўғрисини айтяпман. Европалик дўстларимга шуни айтаман: баҳсга қўшилинг. Сиз музокара столида қатнашамизми йўқми, деб нолиш билан эмас, балки аниқ таклиф ва ғоялар билан келиб, мудофаа харажатларини ошириш орқали иштирок этинг”, деди у.

Келлогнинг айтишича, аввалги Украина-Россия тинчлик музокаралари кўплаб давлатлар иштирок этгани сабабли муваффақиятсиз тугаган, чунки улар бундай жараённи амалга ошира оладиган кучга эга эмас эди.

“Биз бу йўлга кирмаймиз”, дейди у.

Келлогнинг сўзларига кўра, асосий масала – уруш яна бошланмаслигига кафолат бериш ва Украинага суверенитетини сақлаб қолиш имконини беришдир. У буни ишончли хавфсизлик кафолатисиз амалга ошириб бўлмаслигини айтиб, Трамп ҳозирча бундай кафолатни аниқлаш босқичида эмаслигини билдирган.

“Трамп тўлиқ ҳаракат доирасини кўриши керак ва ҳозирча барча вариантлар стол устида турибди”, деди у.  

Шунингдек, Келлог музокаралар яқин ҳафталар ва ойлар ичида якунланиши мумкинлигини айтиб, энг муҳим масала сулҳ шартлари бузилганда қандай чоралар кўрилишини ҳал қилиш эканини таъкидлаган. Бундан ташқари, у НАТО орқали ишлаётганини, АҚШнинг Яқин Шарқ бўйича махсус вакили Стив Уиткофф эса Россия билан боғланаётганини маълум қилган.

Эслатиб ўтамиз, аввалроқ Европанинг бир қанча давлатлари Россия билан “келажакда тинчлик келишувини таъминлашга кўмаклашиш” учун Украинага қўшин юбориш режаси устида яширинча ишлаётгани хабар қилинганди. Европаликлар бу вариантни тахминан бир йил аввал кўриб чиқишни бошлаган. Муҳокамаларда энг фаол Британия ва Франция саналади. Европа контингенти ҳажми тинчлик шартномаси шартларига боғлиқ.