Европа Украина музокараларида иштирок этишини талаб қилмоқда

Украина ва Европа Украинадаги урушни тугатиш бўйича ҳар қандай музокараларнинг бир қисми бўлиши керак. Бундай фикрни Германия, Франция, Польша, Буюк Британия, Испания, Италия Ташқи ишлар вазирлари, шунингдек, Европа Иттифоқи ташқи сиёсат хизмати ва Еврокомиссия кеча, 12 февраль куни АҚШ ва Россия Президентлари – Дональд Трамп ва Владимир Путин ўртасида Украина бўйича телефон суҳбатидан сўнг эълон қилган қўшма баёнотида билдиришди.

“Украинада адолатли ва мустаҳкам тинчлик ишончли трансатлантик хавфсизликнинг зарурий шартидир”, дейилади ҳужжатда.

Европа дипломатлари таъкидлаганидек, улар “Америка иттифоқчилари билан” кейинги ҳаракатлар бўйича музокараларни интиқлик билан кутмоқдалар. Баёнот муаллифларининг фикрича, умумий мақсад “Украинани кучли мавқега олиб чиқиш” бўлиши керак.

Баёнотни Ташқи ишлар вазирлари имзолаган Европа давлатлари ҳам Украинани қўллаб-қувватлашни кучайтиришга тайёр эканликларини билдиришмоқда ва бу давлатга хавфсизлик кафолатларини бериш зарур деб ҳисоблайдилар.

“Биз Украинани қўллаб-қувватлашимизни кучайтиришга тайёрмиз. Биз Россиянинг тажовузкор уруши олдида унинг мустақиллиги, суверенитети ва ҳудудий яхлитлигини ҳимоя қиламиз. Биз адолатли, кенг қамровли ва мустаҳкам тинчликка эришилгунга қадар Украинани қўллаб-қувватлаш мақсадини баҳам кўрамиз”, дейилади қўшма баёнотда.

DPA агентлигининг аниқлик киритишича, бу Украина ва Европа давлатлари манфаатларини кафолатлайдиган тинчлик келишувини назарда тутади.

Эслатиб ўтамиз, кеча, 12 февраль куни АҚШ ва Россия президентларининг биринчи тасдиқланган телефон мулоқоти бўлиб ўтганди. Муҳим мавзу Украинадаги урушни тугатиш имконияти эди. Владимир Путин билан суҳбатдан сўнг Дональд Трамп Украина Президенти Владимир Зеленскийга ҳам қўнғироқ қилди. Кейинроқ Оқ уйда журналистлар билан суҳбатда Трамп Саудия Арабистонида Путин билан шахсий учрашув ўтказилишини эълон қилди ва Украинанинг НАТОга қабул қилиниши ноўрин ва барча босиб олинган ҳудудларнинг Киевга қайтарилиши “эҳтимоли йўқ” деган фикрни билдирди.