Европа 5 йил ичида йўқолиб кетиши мумкин – Макрон

Франция Президенти Эммануэль Макроннинг айтишича, агар зарур чоралар кўрилмаса, Европа беш йил ичида жиддий инқирозга юз тутиб, йўқолиб кетиш хавфи остида қолади. Бу ҳақда у бугун, 10 февраль куни “Tagesanzeiger”  газетасига берган интервьюсида маълум қилди.

Макрон Европада айрим муҳим саноат тармоқлари – кимё, автомобилсозлик ва станоксозлик соҳаларида кескин пасайиш кузатилаётганини таъкидлаган. Унинг сўзларига кўра, бу соҳалардаги вазият сўнгги 18 ой ичида тубдан ўзгарган.

Франция Президенти Европа ҳозир икки томонлама инқирозга дуч келганини айтган. Бир томондан Хитой билан савдо босими кучайган бўлса, иккинчи томондан АҚШ сиёсатида беқарорлик мавжуд. Макрон Европа ушбу жараёнларда ёки томошабин бўлиши, ёки фаол иштирок этиши лозимлигини таъкидлаган. 

Шунингдек, у Гренландия билан боғлиқ вазиятни Европа учун муҳим геосиёсий бурилиш нуқтаси деб атаган. Макроннинг фикрича, бу ҳолат Европага таҳдид борлигини яққол кўрсатиб турибди.

Маълумот учун, Гренландия Дания қироллиги таркибига киради. Дональд Трамп эса орол АҚШ таркибига қўшилиши кераклигини бир неча бор билдирган. Дания ва Гренландия расмийлари эса ўз ҳудудий яхлитлиги ҳурмат қилинишини талаб қилмоқда.

Эслатиб ўтамиз, аввалроқ Эммануэль Макрон Европа геосиёсий ва геоиқтисодий фавқулодда вазиятда эканини айтган эди. У Европа Иттифоқи етакчиларини Америка технологияси ва Хитой импорти қаршисида орқада қолмаслик учун тезкор иқтисодий ҳаракатга чақирган.

Жамшидбек Амиров