ЕИ Сурияга қарши иқтисодий санкцияларни бекор қилмоқчи

Европа Иттифоқи (ЕИ) давлатларининг Ташқи ишлар вазирлари Сурияга қарши иқтисодий санкцияларни бекор қилишга келишиб олди. Бу ҳақда кеча, 20 май куни ЕИнинг Ташқи сиёсат ва хавфсизлик бўйича олий вакили Кая Каллас Х ижтимоий тармоғидаги саҳифасида маълум қилди.

“Бугун биз Сурияга қарши иқтисодий санкцияларни бекор қилишга қарор қилдик. Сўнгги 14 йил давомида Европа Иттифоқи сурияликлар билан бирга бўлди ва бундан кейин ҳам шундай бўлади”, деб ёзди Каллас.

Унинг билдиришича, ЕИ вазирлари Сурия халқига “янги, инклюзив ва тинч Сурияни тиклаш”да ёрдам бермоқчи.

“Сурия ҳукумати тўғри йўлдан кетаётганига доир хавотирлар бор. Аммо, менимча, бизда бошқа йўл йўқ. Биз Европа Иттифоқи ўлароқ қабул қилган қарорларимизни жамоатчиликка етказиш борасида унчалик натижадор эмасмиз. Аслида ушбу чекловларни бекор қилиш устида бир неча ойдан бери ишлаяпмиз”, дейди у.

Муваққат Сурия ҳукуматининг ташқи ишлар вазири Асад ал-Шайбоний ЕИга миннатдорлик билдирар экан, бу қарор мамлакатда хавфсизлик ва барқарорликни мустаҳкамлашга хизмат қилишини айтди.

Маълумот учун, сўнгги йилларда Сурия Европа билан жуда кам савдо қилган. Бунга асосий сабаб 2011 йилда Асадлар оиласининг ўн йиллик авторитар бошқарувига қарши бошланган қўзғолон ортидан Европа Иттифоқи томонидан жорий этилган кенг кўламли санкциялар дастури бўлди. ЕИ санкциялари нефть эмбаргосини, айрим технологияларни экспорт ва импорт қилишдаги чекловларни, шунингдек, қатъий молиявий чекловларни ўз ичига олади.

Европа Иттифоқи қурол-яроғ ва ички репрессиялар учун ишлатилиши мумкин бўлган технологиялар билан боғлиқ санкцияларни “хавфсизлик сабаблари” туфайли сақлаб қолишини маълум қилди.

Эслатиб ўтамиз, жорий йилнинг 13 май куни АҚШ Президенти Дональд Трамп Сурияга қўйилган санкцияларни олиб ташлаш ва “унга иккинчи имконият бериш”га ваъда берди. Унинг айтишича, бу чекловлар “қатъий ва фалокат даражасида” бўлган, аммо ўз вазифасини бажарган.

Кейинроқ эса Дональд Трамп Саудия Арабистонига ташрифи давомида Сурия муваққат президенти Аҳмад аш-Шара билан шахсан учрашди. Учрашувда Трамп яна бир бор АҚШнинг Сурия бўйича санкцияларни бекор қилишини эълон қилган. Бу қарор Саудия валиаҳд шаҳзодаси Муҳаммад бин Салмондан келган илтимосга биноан амалга оширилган.