Ярим млн долларлик крипто-активни айлантирган шахс ушланди (видео)

Фарғона вилоятида ноқонуний крипто-активлар савдоси билан шуғулланган шахс аниқланди. Бу ҳақда Ички ишлар вазирлиги хабар берди.

Маълум қилинишича, унинг хонадонидан 1 дона ноутбук, 2 дона мобиль телефон ҳамда 43 та банк пластик картаси ашёвий далил сифатида олинган.

Суриштирувларда гумонланувчи мазкур қурилмалар орқали ноқонуний крипто-активлар савдоси билан шуғулланиб, умумий қиймати 500 минг АҚШ долларига тенг бўлган USDT крипто-активлари бўйича операцияларни амалга оширгани аниқланган.

Мазкур ҳолат юзасидан Жиноят кодексининг 278-8-моддаси (крипто-активлар айланмаси соҳасидаги қонунчиликни бузиш) билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Тошкент шаҳрининг Сергели туманида Telegram орқали гиёҳвандлик воситаларини тарқатиш билан шуғулланганликда гумон қилинган шахсдан жиноий фаолиятдан олинган қарийб 50 минг АҚШ долларига тенг крипто-активлар аниқлангани ҳақида хабар берилган эди.