Япониядаги ўзбекистонликлар ҳам огоҳлантирилди

Японияда бўлиб турган Ўзбекистон фуқаролари айрим одамларнинг ноқонуний иш ёки хавфли таклифларга ундаши мумкинлигидан огоҳлантирилди. Бу ҳақда Миграция агентлиги хабар берди.

Япония – қонунларга қатъий амал қилинадиган, тартибли мамлакат эканини эслатган агентлик шунинг учун қуйидаги ҳолатларга дуч келганда алданмаслик ва уни рад этишни тавсия қилган:

• “Маошингни солиқдан озод қиламиз” – бу ноқонуний;
• “Яширинча қўшимча ишлайлик” – иш визангиз бузилиши мумкин;
• “Кел, қимор ўйнаймиз” – бундай ўйинлар кўп ҳолларда ноқонуний ва жазоланади;
• “Бошқа ташкилотда ишлайвер, мен резидент картани ясатиб бераман” – ясама ID карталардан фойдаланманг;
• “Бошқа одамнинг банк карталарини ишлатманг ва ўз банк картангизни сотманг” – банк карталари савдоси, катта жиноятларга қўшилиб қолишингизга сабаб бўлиши мумкин!

Шунингдек, хабарда фуқаролардан ҳар қандай ишни бошлашдан олдин расмий ҳужжатлар ва виза шартларини текшириш, гумонли таклифлар ҳақида маҳаллий идораларга ёки элчихонага мурожаат қилиш сўралган. Бу ҳақда кўпроқ маълумотни Япониянинг Иммиграция хизматлари агентлиги сайтида олиш мумкин.

Эслатиб ўтамиз, аввалроқ Россияга бораётган ўзбекистонликлар огоҳлантирилганди. Унга кўра, жорий йил 30 июндан бошлаб визасиз тартибда Россияга бораётганлар “Gosuslugi RuID” мобил иловаси орқали олдиндан рўйхатдан ўтиши ва QR-код олиши шарт бўлади.