Японияда вафот этган аёлнинг жасади Ўзбекистонга қайтарилди

Кеча, 1 август куни Японияда ҳалок бўлган аёлнинг жасади Ўзбекистонга қайтарилди. Бу ҳақда “Дунё” ахборот агентлиги хабар берди.

Қайд этилишича, Вазирлар Маҳкамасининг “Ўзбекистон Республикаси фуқароларини хорижда ташкиллаштирилган тартибда ишга жойлаштириш тизимини янада такомиллаштириш чора-тадбирлари тўғрисида”ги 252-қарорига мувофиқ Ўзбекистоннинг Япониядаги элчихонаси ва Миграция агентлиги томонидан жасадни ватанга қайтариш билан боғлиқ харажатларни қоплаш, марҳуманинг 2 нафар вояга етмаган фарзандлари ҳамда турмуш ўртоғига авиачипталар харид қилишда амалий ёрдам кўрсатилган.

Элчихона консуллик ходими томонидан вафот этган фуқаронинг жасадини рейсга топширишдаги ташкилий ишларда кўмак кўрсатилиб, ушбу рейс билан Ўзбекистонга қайтаётган оила аъзоларини аэропортда кузатиб қўйилган.

Эслатиб ўтамиз, аввалроқ Россияда вафот этган фуқаронинг жасади шунингдек, унинг турмуш ўртоғи ва бир нафар фарзанди Калининград — Москва — Тошкент йўналиши орқали бир вақтнинг ўзида Ўзбекистонга қайтарилганди.