Японияда ўзбекистонлик эркак йўловчи аёлга жинсий тажовуз қилишда гумонланмоқда

Японияда Ўзбекистон фуқароси йўловчи аёлга ҳужум қилиб, унга тажовуз қилишда гумонланмоқда. Бу ҳақда “Fuji News Network” хабар берди.

Қайд этилишича, ҳодиса жорий йилнинг 6 март куни Нагоя шаҳрининг Нака туманида содир бўлган. Йўловчилардан бири автомобиль тўхташ жойида ёрдам сўраб бақираётган аёлнинг овозини эшитиб, полицияни чақирган.

Ҳуқуқ-тартибот идоралари ҳодиса жойига етиб борганида 28 ёшли аёл ёрдам сўрагани аниқланган. Шу ернинг ўзида 31 ёшли Ўзбекистон фуқароси бўлган ишсиз эркак қўлга олинган. Унга тажовуз қилиш айби қўйилган.

Дастлабки тергов маълумотларига кўра, гумонланувчи аёлни ишга кетаётганда ҳеч ким йўқ жойга олиб бориб, унга ҳужум қилган. Бироқ у ўз айбини рад этиб, ҳаракатлари зўравонлик деб баҳоланмаслигини таъкидлаган.

Эслатиб ўтамиз, аввалроқ Россиянинг Москва вилоятида 35 ёшли ўзбекистонлик эркак деярли бир ой давомида 11 ёшли ўгай қизини зўрлаганликда айбланганди.