Японияда турнирдан сўнг 2 боксчи вафот этди

Япониялик профессионал боксчилар – 29 ёшли Хирумаса Уракава ва 28 ёшли Сигетоси Котари жангдан кўп ўтмай вафот этди. Бу ҳақда Жаҳон бокс ташкилоти (WBO) хабар берди.

Қайд этилишича, спортчилар жорий йилнинг 2 август куни Япония пойтахти Токиода бўлиб ўтган турнирда рингга чиққан. Уракава саккизинчи раундда техник нокаут билан ватандоши Эдзи Саитога ютқазган. У жанг давомида бошидан оғир жароҳат олган. Спортчи зудлик билан шифохонага ётқизилган ва бош мия ички қон кетиши туфайли операция қилинган. Шифокорлар унинг ҳаётини сақлаб қолиш учун курашган. Боксчида краниотомия (бош суягини очиш) амалиёти ўтказилган, аммо у жорий йилнинг 9 август куни вафот этган. 

“Ушбу ниҳоятда оғир паллада марҳумнинг оила аъзолари, яқинлари ва Япония бокс ҳамжамиятига чуқур таъзия билдирамиз”, дейилади WBO баёнотида.

Уракава худди шу турнирда ҳаётдан кўз юмган иккинчи спортчи бўлди. WBO олдинроқ 28 ёшли япон боксчиси Сигетоси Котарининг ҳам вафот этганини маълум қилган. У ҳам титул жангидан сўнг худди шундай жароҳат оқибатида ҳаётдан кўз юмган. Ушбу спортчи ўз ҳамюрти Ямато Хата билан жанг ўтказган. Унда Шарқий ва Тинч океани бокс федерациясининг иккинчи енгил вазн тоифасидаги (59 килограмгача) чемпионлик камарига даъвогар аниқланиши керак бўлган. Жанг тўлиқ 12 раунд давом этган ва кўпчилик ҳакамларнинг қарори билан дуранг натижа қайд этилган. Хата ўз унвонини ҳимоя қилган.

Жанг давомида Котари бошидан оғир жароҳат олган. Беллашувдан сўнг у шифохонага ётқизилган ва операция қилинган. Бироқ орадан бир неча кун ўтиб 28 ёшли япониялик спортчи вафот этган.

Эслатиб ўтамиз, аввалроқ япониялик ярим ўрта вазн тоифасидаги боксчи Жин Сасаки америкалик Брайан Норман Жуниор билан жангда оғир зарбадан сўнг хотирасини йўқотганди. У сўнгги бир ярим ой ичида нима бўлганини эслай олмаган.