Япония 50 йил ичида илк бор пандаларсиз қолади

Келаси йил январь ойида Япония 1973 йилдан буён илк бор ўз ҳайвонот боғларидаги барча пандалардан айрилади. Бунга Хитой билан муносабатларнинг совуқлашуви сабаб бўлмоқда. Бу ҳақда “Kyodo” хабар берди.

Нашрнинг ёзишича, Японияда қолган сўнгги гигант пандалар – Токио шаҳридаги Уэно ҳайвонот боғида яшовчи эркак Сяо-Сяо ва урғочи Лей-Лей эгизаклари 2026 йил январь ойида Хитойга қайтарилиши керак. Чунки февраль ойида уларнинг ижара муддати якунига етади.

Жорий йилнинг июнь ойида Япония Вакаяма префектурасидаги “Advanture World” боғидан тўртта пандани Хитойга қайтарган. Шундан сўнг мамлакатда фақатгина Уэно ҳайвонот боғидаги эгизак пандалар қолган.

Қайд этиш жоиз, ҳозирда Токио ва Пекин ўртасидаги муносабатлар совуқлашув даврини бошдан кечирмоқда. Бунга Япония Бош вазири Санаэ Такаитининг Тайвань атрофидаги вазиятга оид баёноти сабаб бўлган. У агар бу ҳолат ҳарбий кемалар ва ҳарбий куч қўлланилиши билан кечса, буни “мавжудликка таҳдид солувчи инқироз” сифатида баҳолаш мумкинлигини айтган. Кейинчалик маълум бўлишича, бу жавоб расмий позитсия ўрнида айтилмаган, балки Такаитининг тезкор муносабати бўлган.

Бунга жавобан Хитойнинг Осакадаги бош консули Сюэ Цзянь Х ижтимоий тармоғидаги саҳифасида изоҳ қолдирди.

“Бу ерга ўзбилармонлик билан аралашган бу ифлос бўйнини бир лаҳза ҳам иккиланмай синдиришдан бошқа чорамиз қолмади. Бунга тайёрмисиз?” деган мазмунда пост жойлаган. Кейинчалик ушбу пост ўчириб ташланган.

Шундан сўнг томонлар ўртасида ўзаро норозилик ноталари, элчиларни чақириб олиш ва чақиртиришлар билан боғлиқ бир қатор дипломатик ҳаракатлар юз берди. Такаитининг баёнотларидан тахминан 10 кун ўтиб, ноябрь ўрталарида Хитойнинг Таълим вазирлиги ҳамда Маданият ва туризм вазирлиги ўз фуқароларини хавфсизлик вазияти ёмонлашгани сабабли Японияга сафарлардан тийилишга чақирди. Японияда бўлиб турган хитойликларга эса ҳушёрликни ошириш ва ўзини ҳимоя қилиш чораларини кучайтириш тавсия этилди.

Хитой авиакомпаниялари Японияга парвозлар учун чипталарни бепул қайтариш имкониятини таклиф қилди. Муносабатлар кескинлашуви фонида Хитойда япон санъаткорларининг чиқишлари ва япон филмларининг намойиши ҳам бекор қилина бошланди.