Япония ҳукумати истеъфога чиқди

Япония Бош вазири Фумио Кисида кабинети парламентнинг кеча, 30 сентябрь куни якунланган навбатдан ташқари сессиясида истеъфога чиқди. Бу ҳақда мамлакатнинг “Kyodo” ахборот агентлиги хабар берди.

Бугун, 1 октябрь куни парламентда Япониянинг ҳукмрон Либерал-демократик партияси етакчиси Сигэру Исибани ҳукуматнинг янги раҳбари этиб тайинлаш бўйича овоз берилиши кутилмоқда.

Исиба 27 сентябрь куни икки тур овоз беришдан сўнг ЛДП раиси этиб сайланди.

“Мен халқимизга ишонаман, ҳақиқатни дадил ва самимий гапираман ва Японияни ҳамма яна табассум билан яшаши мумкин бўлган хавфсиз мамлакатга айлантириш учун бор кучимни ишга соламан”, деди сиёсатчи сайланганидан кейин.

Сигэру Исиба ЛДПдаги энг тажрибали сиёсатчилардан бири бўлиб, бир неча давлат лавозимларида ишлаган: Мудофаа вазири (2007-2008), Қишлоқ хўжалиги вазири (2008-2009) ва Аҳоли сонининг қисқаришига қарши курашиш ва маҳаллий иқтисодиётни жонлантириш вазири (2014-2016).

2002 йилдан 2004 йилгача Исиба Миллий мудофаа агентлигини бошқарган ва Япония ўзини ўзи мудофаа қилиш кучларини ўзгартиришдаги асосий шахслардан бирига айланди. Расмий Япониянинг биринчи разведка сунъий йўлдошининг муваффақиятли учирилиши ва SM-3 Blok IIA баллистик ракетасининг Қўшма Штатлар билан биргаликда ишлаб чиқилишини назорат қилди, шунингдек, Япония ҳарбий хизматчиларининг 2003 йилда БМТ Хавфсизлик Кенгаши рухсатисиз хорижда биринчи марта – Ироққа жойлаштирилишига ёрдам берди.

30 сентябрь куни Сигэру Исиба муддатидан олдин парламент сайловлари ўтказилиши тарафдори эканини маълум қилди.

“Янги ҳукумат имкон қадар тезроқ халқ ҳукмини тинглаши муҳим”, деди сиёсатчи бу борада.

Муддатидан олдин сайловлар режалаштирилганидан бир йил олдин, 2023 йилнинг 27 октябрда бўлиб ўтиши керак эди.

Эслатиб ўтамиз, аввалроқ Япония собиқ Бош вазири Фумио Кисида мамлакатнинг ҳукмрон Либерал-демократик партияси (ЛДП) раиси сайланганидан кейин ҳукумат раҳбари лавозимини тарк этишини айтган эди. Кисида сайловда қатнашмасликка қарор қилганди, чунки ҳукумат рейтинги бир қатор можаролар туфайли, асосан, ЛДПга сиёсий хайрияларни йиғишда молиявий ҳисобот қоидаларини бузиш туфайли рекорд даражага тушиб кетганди.