Яна бир машҳур портал Ўзбекистоннинг ЖЧ-2026'га чиқиш имкониятини баҳолади

Ўзбекистон миллий терма жомасининг Жаҳон чемпионатига тўғридан-тўғри йўлланмани қўлга киритиш имкониятини 92.6 фоизга баҳоламоқда. Бу ҳақда “We Global Football” хабар берди.

Темур Кападзе бошчилигидаги Ўзбекистон миллий терма жамоаси 3-саралаш 7-турида Қирғизистонга қарши 1:0 ҳисобидаги ғалабадан кейин мундиалга чиқиш учун Япония, Эрон ва Жанубий Кореядан кейинги асосий даъвогар бўлиб турибди. 

“А” гуруҳида Эроннинг имкониятлари энг юқори баҳоланган. Форсларнинг 7-турдан сўнг мундиалга чиқиш эҳтимоли 100 фоизга етди. Иккинчи ўринни эгаллаб турган Ўзбекистон тарихда илк бор тўрт йилликнинг энг муҳим турнирида иштирок этиши тахмин қилинган. 7-турда мағлубият аламини татиб кўрган Бирлашган Араб Амирлиги термасининг мундиалга чиқиши 6 фоизга баҳоланган. Қатарда эса ушбу кўрсаткич 1.3 % деб тахмин қилинган. Гуруҳ аутсайдерлари Қирғизистон ва Шимолий Кореяда 2026 йилда бўлиб ўтадиган Жаҳон чемпионатига бориш эҳтимоли 0 фоизга баҳоланди.

Маълумот ўрнида, АҚШ, Мексика ва Канада майдонларида ўтадиган мусобақа учун Осиё қитъасига 8.5 та квота ажратилган. Учта гуруҳдаги 1 ва 2-ўринларни эгаллаган жамоалар тўғридан тўғри йўлланмани қўлга киритса, гуруҳлардаги 3 ва 4-ўринни қўлга киритган терма жамоалар плей-оффлар орқали 2.5 та йўлланма учун кураш олиб боради.

Ўзбекистон терма жамоаси 7-турдан кейин 16 очко жамғариб, “А” гуруҳида 2-ўринни эгаллаб келмоқда. Пешқадам Эрон19 очкони қўлга киритган. БАА ва Қатар 10 тадан очко тўплаб, 3 ва 4-ўринларни банд этган. Қирғизистон 3 ва Шимолий Корея 2 очко билан сўнгги поғоналарни эгаллаб турибди. 

Эслатиб ўтамиз, аввалроқ, “Football meets data” томонидан Ўзбекистоннинг Жаҳон чемпионатига чиқиш имконияти 88 фоизга баҳолагани ҳақида хабар берилган эди.