Яна бир давлат Россияни “терроризм ҳомийси” деб тан олди

Польша парламентининг қуйи палатаси (Сейм) кеча, 14 декабрь куни кечқурун Россияни терроризмни қўллаб-қувватловчи давлат сифатида тан олиш ҳақидаги резолюцияни қабул қилди. 

Қарорни қабул қилиш учун 231 депутат овоз берди, 226 депутат бу овоз беришда қатнашмади. 

“Польша Республикаси Сейми Россия Федерациясини терроризмни қўллаб-қувватловчи ва террорчилик усулларидан фойдаланадиган давлат сифатида тан олади”, дейилади ҳужжат матнида. 

Резолюция матнида 2014 йил июлида Малайзия ҳаво йўллари самолётининг ҳалокатга учраши ва 2010 йил апрелида Смоленск яқинида Польша ҳукумати лайнерининг ҳалокатга учраши учун Россия бевосита жавобгар эканлиги қайд этилган. 

Польша депутатлари резолюцияни фақат иккинчи уринишда қабул қилишга муваффақ бўлди. Ўтган ҳафта мухолифат норозиликлари туфайли овоз бериш ўтказилмади. Сеймдаги можаро Польшада ҳукмрон “Қонун ва адолат” партиясининг охирги лаҳзада Россия Федерациясининг Польшанинг Ту-154М самолётининг Смоленскда қулаши учун жавобгарлиги тўғрисидаги резолюция матнига тузатиш киритишга уриниши туфайли юзага келган.  

Сейм резолюцияси жорий ички ёки ташқи воқеалар бўйича парламент ўз фикрини билдиришнинг рамзий, мажбурий бўлмаган шаклидир. Бу норматив акт эмас. Қоидага кўра, бундай қарорлар ҳукуматнинг ҳаракатларини қўллаб-қувватлаш ёки ҳокимият эътиборини бирон бир муаммога жалб қилиш учун ишлаб чиқилган.