Яман қирғоқлари яқинида яна иккита кемага ҳужум бўлди

Кеча, 7 апрель куни Яман қирғоқлари яқинида иккита кемага ҳужум уюштирилди. Бу ҳақда Британиянинг Ambrey денгиз хавфсизлиги компанияси хабар берди.

Маълум қилинишича, Яманнинг Ал-Мукалла шаҳридан тахминан 102 денгиз мили жануби-ғарбда битта кема ҳужумга учраган. Компания яқин атрофдаги кемалар экипажларини эҳтиёт бўлиш ва ҳар қандай шубҳали ҳаракат ҳақида хабар бериш ҳақида огоҳлантирди. Ambrey ҳужумни ким амалга оширганини айтмади. 

Шунингдек, Ambrey Яманнинг Аден портидан жануби-ғарбда, Адан кўрфазидаги кема яқинида снаряд қулагани ҳақида хабар берган.
Бирлашган Қироллик денгиз савдо операциялари маркази (UKMTO) маълумотларига кўра, ҳодиса Аден портидан 59 денгиз мили жануби-ғарбда содир бўлган, "ракета кемага яқин жойда сувга қулаган".

"Кемага шикаст етганлиги ҳақида хабарлар келиб тушмади ва экипаж хавфсиз. Ҳозирда тергов ҳаракатлари олиб борилмоқда", дейилади UKMTO баёнотида..

Айни пайтда исёнчи Ямандаги ҳусийлар Қизил денгизда Британия кемаси ва бир қатор Америка фрегатларига, шунингдек, Араб денгизи ва Ҳинд океанида Исроил портларига йўл олган иккита Исроил кемасига зарба берганини маълум қилди. Ҳаракатнинг ҳарбий вакили Яҳё Сария ҳарбий амалиётлар охирги 72 соат ичида амалга оширилганини маълум қилди. 

UKMTO ва Ambrey хабарларига кўра, кечаги ҳужумлар Яманнинг Ходейда порт шаҳрининг жануби-ғарбидаги кема яқинида иккита ракета аниқланганидан бир неча соат ўтиб содир бўлган. UKMTO маълумотларига кўра, битта ракета АҚШ бошчилигидаги коалиция кучлари томонидан тутиб олинган, иккинчиси эса кема яқинидаги сувга қулаган.

Маълумот учун, ҳусийлар 2023 йилнинг ноябрь ойидан бери Қизил денгиздаги Ғарб савдо кемаларига дронлар ва ракеталар билан ҳужум қилиб келмоқда. Гуруҳ ўз ҳаракатларини Исроилнинг Ғазо секторидаги ҳарбий амалиётларига норозилик деб атади ва Исроил билан боғлиқ барча кемаларга ҳужум қилишга ваъда берди. Айни пайтда нафақат ҳарбий кемалар, балки турли давлатларнинг савдо кемалари ҳам ҳусийларнинг нишонига айланмоқда.