Ямалнинг 11 миллион евролик уйида ўғирликка уриниш содир бўлди

Испания терма жамоаси ва “Барселона” ярим ҳимоячиси Ламин Ямалнинг Барселона шаҳри яқинидаги Эсплугес-де-Льобрегатда жойлашган уйида ўғирликка уриниш содир этилди. Бу ҳақда “El Espanol” нашри хабар берди.

Ҳодиса кеча, 14 июль куни кечқурун, Испания терма жамоаси 2026 йилги Жаҳон чемпионати ярим финалида Францияни 2:0 ҳисобида мағлуб этиб, финалга йўл олган пайтда юз берган. Ўша вақтда Ламин Ямаль АҚШда бўлиб, мазкур учрашувда тўлиқ 90 дақиқа ҳаракат қилди. У ишлаб берган пенальтини Микель Оярсабаль аниқ амалга оширди.

Нашр маълумотига кўра, ниқоб таққан икки нафар номаълум шахс ҳовли деворидан ошиб, мулк ҳудудига киришга уринган. Бироқ хавфсизлик хизмати ходимлари уларни кузатув камералари орқали ўз вақтида аниқлаган. Шундан сўнг зудлик билан чора кўрилган ва гумондорлар уй ичига кира олмасдан воқеа жойидан қочиб кетган. Каталония полицияси ушбу ҳодиса юзасидан тергов ишларини бошлаган.

Маълум қилинишича, Ямаль яшайдиган қаср аввалроқ машҳур хонанда Шакира ҳамда “Барселона”нинг собиқ ҳимоячиси Жерар Пикега тегишли бўлган. Уйнинг тахминий қиймати 11 миллион евро деб баҳоланмоқда.

Жаҳон чемпионати финалига чиққан Испания терма жамоаси энди жорий йилнинг 19 июль куни бўлиб ўтадиган Аргентина – Англия баҳси ғолиби билан тўқнаш келади.