Ямаль Ла Лигада ойнинг энг яхши футболчиси деб топилди

“Барселона” 18 ёшли футболчиси Ламин Ямаль Ла Лигада ноябрь ойининг энг яхши футболчиси деб топилди. Бу ҳақда Ла Лига ўзининг расмий саҳифасида маълум қилди.

Овоз бериш жараёнларида Ямаль Килиан Мбаппе (“Реал Мадрид”), Антуан Гризманн (“Атлетико Мадрид”), Микель Оярсабаль (“Реал Сосьедад”) ва Жерар Морено (“Вильярреал”)ни ортда қолдириб, ушбу совринни қўлга киритди.

Жорий йилнинг ноябрь ойида Каталониянинг “Барселона” жамоаси Испания Ла Лигаси доирасида тўртта ўйин ўтказди. Ханс-Дитер Флик шогирдлари ушбу учрашувларнинг барчасида ғалаба қозонди. Аввалига жамоа “Элче”ни 3:1 ҳисобида, сўнг “Селта”ни 4:2 ҳисобида мағлуб этди. “Атлетик Билбао”га қарши “Кам Ноу”даги очилиш ўйинида эса рақиб 4:0 ҳисобида таслим бўлди. Ойнинг якунида каталонияликлар “Алавес”ни 3:1 ҳисобида енгди. Ламин Ямаль ушбу учрашувларда учта гол урди ва яна учта голли узатма берди.

Жорий мавсумда Ламин Ямаль клуб сафида барча турнирларда 15 та ўйин ўтказиб, 7 гол ва 7 голли узатмани амалга оширди.

Маълумот учун, ҳозирда “Барселона” жамоаси Ла Лига турнир жадвалида 37 очко билан етакчилик қилмоқда. Энг яқин таъқибчиси “Реал Мадрид” эса 36 очко билан 2-ўринни эгаллаган.