“Винисиус қоидаси” амалда. Алмирон тарихга кирди

Мигель Алмирон Туркияга қарши ўтказилган Жаҳон чемпионати ўйинида оғзини беркитган ҳолда гапиргани учун қизил карточка олган ҳолда майдондан четлатилди. Бу ҳақда “The Athletic” хабар берди.

Ҳодиса бугун, 20 июнь куни АҚШнинг Калифорния штати, Санта-Клара шаҳрида бўлиб ўтган “Д” гуруҳи ўйинининг биринчи бўлимига қўшиб берилган дақиқаларда содир бўлди. VAR текширувидан сўнг, ҳакам Иван Арсидес Бартон Сиснерос Алмиронни майдондан четлатиш ҳақида қарор чиқарди.

Маълум қилинишича, Исидро Питти билан қоидабузарликдан кейин ўйин тўхтатилган. Футболчилар ён чизиқ яқинида тўпланганда, Алмирон оғзини қўли билан ёпган ҳолда Мерт Мюлдюрга бир нима деган. Шундан сўнг, Мюлдюр ёрдамчи ҳакам томон югуриб, ҳолатга эътибор қаратган.

Ушбу қизил карточка Алмироннинг 3-турда бўладиган Парагвайнинг Австралияга қарши гуруҳ ўйинини ўтказиб юборишига сабаб бўлади. Шу билан бирга, FIFA интизом қўмитаси қўшимча жазо қўллаши ҳам мумкин.

Қайд этилишича, Алмироннинг майдондан четлатилиши IFAB томонидан жорий йилнинг апрель ойида киритилган янги қоида бўйича биринчи ҳолат бўлди. Ушбу ўзгаришга кўра, ўйин вақтида оғизни беркитиш ва ҳақоратли ёки дискриминацион сўзлар айтиш ҳолатлари қизил карточка билан жазоланади.

Алмирон томонидан ҳақоратли сўзлар айтилгани ҳақида ҳозирча расмий тасдиқ йўқ.

Маълумот учун, ушбу баҳсда Туркия терма жамоаси бир киши кўп бўлишига қарамай 0:1 ҳисобида имкониятни бой берди ва плей-оффга чиқиш имкониятини йўқотди.